काठमाडौं — सेयर बजारको परिसूचक नेप्से सोमबार पनि उकालो लागेको छ। लगातार पाँचौं दिन बढेको नेप्से ४१.७० अंकले माथि उक्लिएर २ हजार ७ सय १९.२४ विन्दुमा पुगेको छ। यद्यपि गत शुक्रबारको तुलनामा वृद्धिदर भने कमजोर छ। शुक्रबार नेप्से ७९.७४ अंकले बढेको थियो।
सोमबारको कारोबारमा २३९ कम्पनीको मूल्य बढेको छ भने ३२ वटाको घटेको छ। ५ कम्पनीको मूल्य भने स्थिर रहेको छ। कुल ६७ हजार १ सय ५५ पटकको कारोबारमा १ करोड २२ लाख ४५ हजार ३ सय ३७ कित्ता सेयर खरिदबिक्री भएको छ। सो दिन ५ अर्ब ५१ करोड २६ लाख रुपैयाँको कारोबार भएको छ।
बजारमा रहेका १३ उपसमूहमध्ये सामुहिक लगानी कोषको परिसूचक मात्रै घटेको छ भने बाँकी सबैको परिसूचक बढेको छ।