करिब साढे पाँच महिनाको लामो रोकावटपछि नेपाल धितोपत्र बोर्ड (सेबोन) ले हिमपर्वत हाइड्रोपावर लिमिटेडलाई प्राथमिक सेयर (आईपीओ) निष्कासनको अनुमति दिएको छ । बोर्डको सञ्चालक समिति बैठकले उक्त कम्पनीलाई अनुमति दिने निर्णय गरेसँगै रोकिएको आईपीओ स्वीकृति प्रक्रिया पुनः सुरु भएको छ ।
अनुमतिअनुसार हिमपर्वत हाइड्रोपावरले ५९ लाख १५ हजार कित्ता सेयर जारी गर्न पाउनेछ । कम्पनीको प्रतिकित्ता सेयरको अंकित मूल्य १ सय रुपैयाँ तोकिएको छ ।
गत वैशाखको पहिलो साता तत्कालीन बोर्ड अध्यक्ष सन्तोषनारायण श्रेष्ठ पदबाट बाहिरिएपछि नयाँ आईपीओ जारी गर्ने अनुमतिको प्रक्रिया अड्किएको थियो । त्यसपछि सरकारले गत असारको पहिलो साता गोपाल भट्टलाई बोर्ड अध्यक्षमा नियुक्त गरेको थियो ।
अध्यक्षमा भट्ट नियुक्त भएको साढे चार महिनापछि आईपीओ निष्कासनको अनुमति पाउने पहिलो कम्पनीका रूपमा हिमपर्वत हाइड्रोपावर लिमिटेड रहेको छ । कम्पनीले मंसिर २०८१ मै निष्कासन अनुमतिका लागि बोर्डमा निवेदन दिएको थियो ।