मुख्यमन्त्री हिक्मत कार्कीको विकल्प खोज्दै केपी ओली, तिलकुमार मेन्याङ्बोसँग छलफल

नेकपा (एमाले) अध्यक्ष केपी शर्मा ओलीले कोशी प्रदेशको मुख्यमन्त्री हिक्मतकुमार कार्कीको विकल्प खोज्न थालेका छन्। स्रोतका अनुसार ओलीले संसदीय दलका उपनेता तिलकुमार मेन्याङ्बोलाई आफ्नो निवासमा बोलाएर यस विषयमा छलफल गरेका हुन्।

एमाले र नेकपाबीच भएको सत्ता सहकार्यको सहमतिअनुसार कोशीसहित तीन प्रदेशको नेतृत्व एमालेले पाउने टुङ्गो लागेको छ। तर कोशी प्रदेशमा मुख्यमन्त्रीको जिम्मेवारी कसले सम्हाल्ने भन्ने विषयमा पार्टीभित्र नयाँ बहस सुरु भएको छ।

पार्टीभित्रको बहस

अध्यक्ष ओलीले कार्कीको सट्टा मेन्याङ्बोलाई अघि सार्न खोजेको अनुमान गरिएको छ। मेन्याङ्बोका शुभचिन्तकहरूले उनलाई अग्रिम बधाई समेत दिइरहेका छन्। तर पार्टीभित्र कार्कीको पक्षमा पनि बलियो मत रहेको छ। महासचिव शंकर पोखरेल र उपाध्यक्ष विष्णु पौडेलसहितका पदाधिकारीहरू कार्कीको पक्षमा रहेको स्रोतले बताएको छ।

कार्की एमालेका केन्द्रीय सचिव समेत हुन्। उनी कुनै समय अध्यक्ष ओलीका विश्वासपात्र मानिन्थे तर पछिल्लो समय सम्बन्ध चिसिएको छ। पार्टीको नीतिगत बहसहरूमा कार्कीले ओलीको लाइनभन्दा फरक मत राख्ने गरेको बुझाइ छ।

संसदीय दलको भनाइ

एमाले कोशी प्रदेश संसदीय दलका प्रमुख सचेतक रमेशकुमार बस्नेतले भने हालसम्म दलभित्र नेतृत्वको विषयमा औपचारिक छलफल नभएको बताए। “केन्द्रमा सहमति भएको खबर आएको छ, तर प्रदेशमा सरकारको नेतृत्व कसले गर्ने भन्नेबारे पार्टी र संसदीय दलमा कुनै छलफल भएको छैन,” उनले भने।

मेन्याङ्बो हाल कोशी प्रदेश एमाले संसदीय दलका उपनेता हुन् र बरीयतामा कार्कीपछिको दोस्रो स्थानमा छन्। उनी यसअघि कार्कीकै नेतृत्वको सरकारमा खानेपानी, सिँचाइ तथा ऊर्जामन्त्री बनिसकेका छन्। २०५६ सालमा ताप्लेजुङबाट प्रतिनिधिसभा सदस्य निर्वाचित मेन्याङ्बो अनुभवी नेता हुन्।

कोशी प्रदेशमा हालसम्म ९ पटक सरकार गठन भइसकेको छ। यदि मेन्याङ्बो मुख्यमन्त्री बनेमा उनी प्रदेशको दशौँ मुख्यमन्त्री हुनेछन्। यसअघि शेरधन राई, भीमप्रसाद आचार्य, राजेन्द्रकुमार राई, उद्धव थापा, केदार कार्की र हिक्मतकुमार कार्कीले मुख्यमन्त्रीको जिम्मेवारी सम्हालिसकेका छन्।