पाकिस्तानको ८,०४७ मिटर अग्लो कराकोरम हिमाल ब्रोड पिकमा बिहीबार हिमपात हुँदा बेपत्ता भएकामध्ये चार आरोहीको शव भेटिएको छ। शुक्रबार साँझसम्म उद्धार टोलीले चार शव फेला पारेको जानकारी दिएको छ, जसमध्ये दुई जनाको पहिचान खुलिसकेको छ।
भेटिएकामध्ये नेपाली आरोही पूरबहादुर गुरुङ 'युक्ता' र ओमानी आरोही नाधिरा अल हार्थीको शव स्कार्दु पुर्याइएको छ। बाँकी दुई शवको पहिचान भने आधिकारिक रूपमा पुष्टि भइसकेको छैन। उद्धार टोलीले ड्रोन सर्भेलेन्सका क्रममा थप चार शव देखेको भनिए पनि त्यसको आधिकारिक प्रमाणित हुन बाँकी रहेको बताइएको छ।
हिमपात र बेपत्ता आरोही
बिहीबार १० सदस्यीय अन्तर्राष्ट्रिय आरोही टोली सन्मिट प्रयासका लागि क्याम्प दुईबाट क्याम्प तीनतर्फ जाँदै गर्दा हिमपात भएको थियो। हिमपातपछि सबै आरोहीसँगको सम्पर्क टुटेको अल्पाइन क्लब अफ पाकिस्तानले जनाएको छ। हालसम्म सम्पर्कविहीन रहेकाहरूमा नेपाली आरोही निर्मल पूर्जा, किली पेम्बा शेर्पा, निमा शेर्पा, नावाङ थिन्डु शेर्पा र ग्यालु शेर्पाका साथै पाकिस्तानका सोहाइल साखी, अमेरिकी आरोही म्यालोरी गेइस र चीनका आरोही वाङ झोङ रहेका छन्।
शुक्रबार दिनभर हेलिकप्टर र जमिनबाट खोज तथा उद्धार कार्य जारी रहेको छ। चुनौतीपूर्ण मौसम र दुर्गम भूभागका बाबजुद उद्धार टोली परिचालित भएको बताइएको छ।
खोज तथा उद्धारमा नेपालको पहल
नेपालको परराष्ट्र मन्त्रालयका अनुसार इस्लामाबादस्थित नेपाली दूतावासले पाकिस्तान सरकार र अल्पाइन क्लब अफ पाकिस्तानसँग समन्वय गरिरहेको छ। पाकिस्तानी अधिकारीहरूले खोज तथा उद्धारमा सबै उपलब्ध साधन परिचालन गर्ने आश्वासन दिएका छन्।
नेपाल पर्वतारोहण संघले घटनाप्रति गहिरो चिन्ता व्यक्त गर्दै प्रभावित सबैको सुरक्षित उद्धार हुने विश्वास व्यक्त गरेको छ। संघका प्रथम उपाध्यक्ष मिङ्मा डेभिड शेर्पाका अनुसार उद्धार हेलिकप्टर र उच्च हिमाली गाइड घटनास्थलमा पठाइसकिएको छ। संघले आरोही, उनीहरूका परिवार, अभियान टोली र उद्धारकर्मीप्रति पूर्ण सहयोग रहने जनाउँदै सबै चाँडै आफ्ना परिवारसँग भेटिने विश्वास व्यक्त गरेको छ।
शुक्रबार नै संघका कार्यवाहक अध्यक्ष ईश्वरी पौडेल नेतृत्वको टोलीले नेपालका लागि पाकिस्तानी राजदूत मोहम्मद अमिर खानसँग भेट गरी उद्धार कार्यलाई सर्वोच्च प्राथमिकता दिन आग्रह गरेको थियो। राजदूतले पाकिस्तान सरकार, अल्पाइन क्लब र स्थानीय उद्धार निकायहरू खोज तथा उद्धारमा युद्धस्तरमा परिचालित रहेको आश्वासन दिएका छन्। संघले अपरेसन समाप्त नभएसम्म सम्बन्धित सबै निकायसँग समन्वय गर्ने जनाएको छ।
एक्सपिडिसन अपरेटर्स एसोसिएसन नेपालले पनि पाकिस्तानसँग कूटनीतिक संलग्नता बढाउन र उद्धारका लागि सम्बन्धित निकायबीच घनिष्ठ समन्वय गर्न सरकारको ध्यानाकर्षण गराएको छ।
निर्मल पूर्जाको ह्याट-ट्रिक अभियान
ब्रोड पिक दुर्घटना प्रसिद्ध नेपाली आरोही निर्मल पूर्जाले जुलाई २२ मा पाकिस्तानकै ग्यासरब्रम दोस्रो आरोहण गरेको केही दिनपछि आएको हो। उक्त आरोहण उनको आठ हजार मिटरभन्दा अग्ला हिमालको ५७औं सफल आरोहण थियो। यससँगै उनले विश्वका सबै १४ आठ हजारी हिमाल र सात सबमिट तीन–तीन पटक आरोहण गर्ने महत्वाकांक्षी ‘ह्याट–ट्रिक प्रोजेक्ट’ पूरा गर्न एक वटा आरोहण मात्र बाँकी रहेको स्रोतले उल्लेख गरेको छ।