लिट्मस इन्डस्ट्रिज लिमिटेडले पोखरामा आफ्नो चौथो पावर पार्टनर्स मिट सम्पन्न गरेको छ। तार, केबल तथा कन्डक्टरको नेपाली उत्पादक कम्पनीको उक्त वार्षिक कार्यक्रममा देशभरका करिब २०० डिलर तथा च्यानल पार्टनरको सहभागिता रहेको कम्पनीले जानकारी दिएको छ।
कम्पनीले प्रेस विज्ञप्तिमार्फत जनाएअनुसार यो वार्षिक कार्यक्रमको मुख्य उद्देश्य साझेदारीलाई सुदृढ गर्नु, विगत पाँच दशकको कम्पनीको वृद्धिको समीक्षा गर्नु र भावी व्यावसायिक रणनीति तर्जुमा गर्नु रहेको छ। कार्यक्रममा कम्पनीका अधिकारीहरूले उत्पादन क्षमता, प्राविधिक विकास र निरन्तर विस्तारका योजनाबारे प्रकाश पारेका थिए।
उत्कृष्ट १२ डिलर सम्मानित
कार्यक्रममा वितरण सञ्जालमा उल्लेखनीय योगदान पुर्याएका १२ डिलरलाई विभिन्न विधामा सम्मान गरिएको छ। उनीहरूलाई राइजिङ स्टार, पेमेन्ट एक्सिलेन्स र लिट्मस एक्सिलेन्स अवार्डजस्ता विधामा पुरस्कृत गरिएको कम्पनीले जनाएको छ।
कार्यक्रमलाई सम्बोधन गर्दै प्रबन्ध निर्देशक रोहित गुप्ताले कम्पनीले उच्च उत्पादन गुणस्तर कायम राख्दै देशैभर डिलर सञ्जाल विस्तार गर्न प्रतिबद्ध रहेको बताए। उनले कम्पनीको वृद्धि च्यानल पार्टनरहरूकै विश्वास र निरन्तर सहयोगका कारण सम्भव भएको उल्लेख गरे। साथै, नवप्रवर्तन र उच्च उत्पादन मापदण्डमा कम्पनीको ध्यान केन्द्रित रहेको उनले दोहोर्याए।
कम्पनीको पृष्ठभूमि र विस्तार योजना
पाँच दशकभन्दा बढी समयदेखि स्थापित लिट्मस इन्डस्ट्रिजले पूर्वाधार, निर्माण, ऊर्जा र औद्योगिक क्षेत्रका लागि तार, केबल तथा कन्डक्टर उत्पादन गर्दै आएको छ। दीर्घकालीन वृद्धि रणनीतिअन्तर्गत कम्पनीले क्षेत्रीय निर्यात बजारमा आफ्नो उपस्थिति विस्तार गरिरहेको पनि बताइएको छ।