हङकङमा जन्मेर हुर्केकी दीपमाला ढकाल मिस नेपाल बन्ने पहिलो गैरआवासीय नेपाली बनेकी छन्। यसपटकको प्रतियोगितामा उनले मिस नेपाल वर्ल्डको उपाधिसँगै चार वटा सहविधा जितेर नयाँ कीर्तिमान पनि कायम गरेकी छन्।
यसवर्ष मिस नेपालमा अर्को इतिहास पनि जोडिएको छ। अनुष्का श्रेष्ठ पहिलो मिस नेपाल सांसद बनेकी छन् र उनले संसदमा कला तथा उद्यमशीलताका विषय उठाइरहेकी छन्। दीपमालाको नाम भने डायस्पोराबाट पहिलो विजेताका रूपमा दर्ता भएको छ।
डायस्पोराको दोस्रो पुस्तालाई जोड्ने अभियान
२४ वर्षीया दीपमाला हाल गैरआवासीय नेपाली संघ (एनआरएनए) को कार्यसमितिमा हङकङबाट दोस्रो पुस्ताकी संयोजक छिन्। एनआरएनएमार्फत उनी विदेशमा रहेका नेपालीको दोस्रो पुस्तालाई स्वदेशसँग जोड्ने काममा सक्रिय छिन्। अब उनी यही मुद्दालाई मिस नेपालकै प्लेटफर्मबाट अघि बढाउन चाहन्छिन्।
बाहिर जन्मेर हुर्केकाहरू पनि नेपाल आएर आफ्नो स्थान बनाउन र देशका लागि योगदान दिन सक्छन् भन्ने सन्देश दिने उद्देश्य आफ्नो रहेको उनी बताउँछिन्। विदेशमा बस्ने नेपालीले देशको माया गर्दैनन् वा मद्दत गर्दैनन् भन्ने आरोपलाई पनि उनले गलत ठहर्याएकी छन्।
क्यान्सर सचेतना र नेपाल–डायस्पोरा जोड्ने प्रयास
मिस नेपालको उपाधि जितेसँगै दीपमालाले नेपाल क्यान्सर अस्पतालको दूतका रूपमा काम थालेकी छन्। यसै क्रममा उनको टिमले हालै वीरगञ्जमा क्यान्सर परीक्षणसम्बन्धी कार्यक्रम सञ्चालन गरेको थियो। क्यान्सर सचेतनाको यो परियोजनामा नेपाल मात्र नभई बाहिर रहेका नेपाली समुदायलाई समेत सहभागी गराउने उनको सोच छ।
क्यान्सरकै कारण भाइ नाता पर्ने आफन्त गुमाएपछि उनी यो अभियानमा झनै दृढ भएकी हुन्। हालै हङकङमा आयोजित एकदिने च्यारिटी पदयात्राबाट उनले ६ लाख रुपैयाँ संकलन गरेकी थिइन्। यही परियोजनाले मिस नेपालमा ब्युटी विथ पर्पस विधा पनि जितेको थियो।
अब उनी सन् २०२७ मा तान्जानियामा हुने मिस वर्ल्डको ब्युटी विथ पर्पसमा यही परियोजना प्रस्तुत गर्ने तयारीमा छिन्। हङकङको नेपाली समुदाय मात्र होइन, समग्र एनआरएन समुदाय नै खुसी भएको उनले बताइन्। मिस नेपालको मञ्चमा बोलिएका कुरा धेरैले सुन्ने भएकाले यसको सदुपयोग गर्नुपर्ने उनको भनाइ छ। स्पटलाइटमार्फत क्यान्सर सचेतनालाई ठूलो रूपमा अघि बढाउने उनको फोकस छ।
१७ नम्बर र आमाको विरासत
दीपमालाको यो उपलब्धिमा आमाको विरासत पनि जोडिएको छ। आमा रोशनीले सन् १९९४ को मिस नेपालमा १७ नम्बरको स्यास लगाएर प्रतिस्पर्धा गरेकी थिइन्। संयोगवश छोरी दीपमालाले पनि १७ नम्बरकै स्यासबाट उपाधि जितेकी हुन्। यसले आमाको अधुरो सपना पूरा गर्ने र सहभागिताको विरासतलाई अघि बढाउने अवसर दिएको उनको बुझाइ छ।
हङकङमा हुँदा आफ्नो पहिचानबारे प्रश्न सोधिने र नेपाल फर्किँदा पनि त्यस्तै प्रश्न भोग्नुपरेको उनी सुनाउँछिन्। जीवनभर आफू नेपाली नै हुँ भन्ने प्रमाणित गर्नुपरे पनि अहिले नेपालले आफूलाई चिनेको महसुस भएको उनको भनाइ छ। मिस नेपालको ताज लगाएर नेपाललाई विदेशमा चिनाउने मौका पाएको र यसबाट देशको प्रतिनिधित्व गर्न पाउँदा गर्व लागेको उनले बताएकी छन्।
मिस वर्ल्डमा राम्रो सहभागिता देखाएर खाली हात नफर्किने उनको लक्ष्य छ। त्यसैका लागि आफूले ताजको मूल्य बढाउने जिम्मेवारी लिएको उनी बताउँछिन्।