किएभमा रुसी मिसाइल हमला, दुई जनाको मृत्यु र २२ घाइते

काठमाडौं, साउन २० । रुसले युक्रेनको राजधानी किएभलाई मिसाइलबाट निशाना बनाएको छ। आक्रमणमा परी दुई जनाको मृत्यु भएको छ भने २२ जना घाइते भएका छन्।

किएभ सहरका अधिकारीहरूले हमलामा एक महिलाको मृत्यु भएको जानकारी दिएका छन्। क्षेत्रीय अधिकारीहरूका अनुसार बुचामा पनि एक अन्य व्यक्तिको ज्यान गएको छ।

रातभर बजेका साइरन

हमला मंगलबार राति अबेर सुरु भएको हो। आक्रमण जारी रहँदा किएभमा घण्टौंसम्म साइरन बजिरहेको थियो। सहरभित्र र बाहिरी क्षेत्रमा धेरै मिसाइल प्रहार भएको बताइएको छ।

युक्रेनको सैन्य प्रशासनका प्रमुख तिमुर तकाचेंकोले किएभमा फेरि ठूलो आक्रमण भइरहेको बताएका छन्।

नागरिक क्षेत्र निशाना बनाइएको आरोप

युक्रेनी सेनाले रुसी सेनाले आम नागरिक र आवासीय क्षेत्रलाई लक्षित गरेको आरोप लगाएको छ। यसबारे रुसले भने कुनै प्रतिक्रिया जनाएको छैन।