सुदूरपश्चिम प्रदेश सरकारले शहीद दशरथ चन्द स्वास्थ्य विज्ञान विश्वविद्यालयका शैक्षिक कार्यक्रमका लागि चार प्रादेशिक अस्पताललाई शिक्षण अस्पतालका रूपमा स्वीकृत गरेको छ। यस निर्णयसँगै विश्वविद्यालयले यसै वर्षदेखि क्लिनिकल शिक्षा कार्यक्रम सुरु गर्ने बाटो खुलेको छ।
प्रदेश मन्त्रिपरिषद्को बिहीबार बसेको बैठकले कैलालीका सेती अस्पताल, लम्कीचुहा अस्पताल र टीकापुर अस्पताल तथा कञ्चनपुरको महाकाली प्रादेशिक अस्पताललाई विश्वविद्यालयको शिक्षण अस्पताल तोक्ने निर्णय गरेको हो।
विश्वविद्यालयको मापदण्डअनुसार सञ्चालन हुने
मुख्यमन्त्री कमलबहादुर शाहका मुख्य निजी सचिव प्रयागराज खनालले विश्वविद्यालयको मापदण्ड र दिशानिर्देशअनुसार ती अस्पतालहरू शैक्षिक कार्यक्रममा प्रयोग हुने बताएका छन्। उनका अनुसार प्रदेश सरकारले आवश्यक कानुनी तथा प्रशासनिक प्रक्रिया अघि बढाउनेछ र सम्बन्धित निकायसँग सम्झौता गरेपछि मात्र अस्पतालहरू विधिवत् शिक्षण अस्पतालका रूपमा सञ्चालनमा आउनेछन्।
ऐनको व्यवस्था
शहीद दशरथ चन्द स्वास्थ्य विज्ञान विश्वविद्यालय ऐन, २०८२ को दफा २० मा संघ, प्रदेश वा स्थानीय तहसँग सम्झौता गरेर विश्वविद्यालयले अस्पतालमा शैक्षिक कार्यक्रम सञ्चालन गर्न वा ती अस्पताललाई शिक्षण अस्पतालका रूपमा प्रयोग गर्न सक्ने व्यवस्था छ। सोही कानुनी व्यवस्थाअनुसार प्रदेश सरकारले अस्पतालहरू स्वीकृत गरेको हो।
यस निर्णयले चिकित्सा तथा स्वास्थ्य विज्ञानका विद्यार्थीका लागि क्लिनिकल तालिमका अवसर सुदृढ हुने र प्रदेशका विद्यमान स्वास्थ्य संरचनाको उपयोग गरी विश्वविद्यालयको शैक्षिक पूर्वाधार विस्तार हुने अपेक्षा गरिएको छ।