सर्लाहीको हरिबनबाट काठमाडौंतर्फ पैदल यात्रा गर्दै आएका ३ सय बढी कर्जा पीडित चितवन पुगेका छन्। माइक्रोफाइनान्स तथा मिटरब्याज कर्जाबाट प्रभावित बालबालिकादेखि वृद्धवृद्धासम्मका उनीहरू नागरिक बचाउ महाअभियानअन्तर्गत १० दिनदेखि पैदल यात्रामा छन्।
यात्रामा धेरैको खुट्टा सुन्निएको छ भने छाला उप्किएको छ। कोही खाली खुट्टा हिँडिरहेका छन् भने कोहीले वर्षाको पानीबाट जोगिन प्लास्टिक र बोरा ओढेका छन्। बाटोमा पर्ने धर्मशाला र मन्दिरमा रात बिताउँदै उनीहरू काठमाडौंतर्फ अघि बढिरहेका छन्।
कर्जाको बोझ
बाराकी जिरामतिले एक लाख रुपैयाँ कर्जा लिँदा त्यो बढेर चार लाख पुगेको बताइन्। उनले भनिन्, “हामी १० दिनदेखि बाटोमा छौं। सरकारले कर्जा माफ गरिदिए हामी बाँच्न सक्थ्यौं।”
बाराकै परमशिला देवीका अनुभवमा बैंकले उनको ८० हजारदेखि एक लाख रुपैयाँसम्मको कर्जा बढाएर तीन लाख पुर्याइदिएको छ। यस्तै कर्जाको साँवा र ब्याजले थिचिएका धेरै व्यक्ति यो पैदल यात्रामा सहभागी छन्।
माग र अडान
यात्रामा सहभागीहरूले कर्जा माफी, कालोसूचीबाट हटाउने र १२ बुँदे सहमति कार्यान्वयन गर्ने माग राखेका छन्। उनीहरूले सरकारको जवाफ नपाएसम्म फर्केर नजाने अडान लिएका छन्।
काठमाडौं पुग्न बाँकी दूरी तय गर्दै कर्जा पीडितहरूको यात्रा जारी छ।