कञ्चनपुर — महाकाली नदीको पानीको सतह घटेपछि शारदा ब्यारेजस्थित बनबासा पुल हुँदै चारपांग्रे सवारी साधन ओहोरदोहोर गर्न थालेका छन्। जिल्ला प्रहरी कार्यालय कञ्चनपुरले शुक्रबार अपराह्न ४ बजेको अवस्थामा गरेको मापनमा नदीको बहाव ९६ हजार ६ सय क्युसेक रहेको छ।
दिउँसोको तुलनामा नदीको बहाव घटेको हो। प्रहरीका अनुसार शुक्रबार दिउँसो महाकालीमा एक लाख १५ हजार क्युसेक पानी बगिरहेको थियो। जिल्ला प्रहरी कार्यालय कञ्चनपुरका डीएसपी टेकबहादुर रावतले पानी घट्न थालेसँगै पुलमा चारपांग्रे सवारी साधनको आवागमन सुचारु गरिएको बताए।
उनका अनुसार अहिले पानी घट्ने क्रममा रहेकाले पुलको अवस्था सामान्य बन्दै गएको छ।
बिहीबारदेखि बढेको थियो जलस्तर
पहाडी जिल्लाहरूमा परेको वर्षाका कारण महाकालीको जलस्तर बिहीबारदेखि बढ्न थालेको थियो। जलस्तर बढेपछि शारदा ब्यारेजको पुलमा चारपांग्रे सवारी साधनको आवागमन रोकिएको थियो।
शुक्रबार दिउँसो एक लाख १५ हजार क्युसेक पुगेको बहाव अपराह्नतिर घटेर ९६ हजार ६ सय क्युसेकमा झरेको हो।
जीर्ण पुलमा जोखिम
झण्डै एक शताब्दी पुरानो शारदा ब्यारेजको पुल जीर्ण अवस्थामा छ। महाकालीमा पानीको बहाव एक लाख क्युसेक नाघ्नेबित्तिकै सो पुलमा चारपांग्रे सवारी साधनको आवागमन रोक्ने गरिएको छ। पुलमा जोखिम हुनसक्ने भन्दै यस्तो व्यवस्था गरिएको हो।
पुल बन्द हुँदा भारततर्फ आवतजावत गर्ने यात्रुहरू पैदल हिँड्न बाध्य हुन्छन्। साना सवारी साधनमा समेत यात्रुहरूले निकै बढी भाडा तिर्नुपर्ने अवस्था रहने गरेको छ।
