दोलखास्थित देशकै ठूलो माथिल्लो तामाकोशी जलविद्युत केन्द्रको जलाशय सफा गर्न आइतबार बिहानदेखि विद्युत उत्पादन बन्द गरिएको छ। करिब १० घण्टा उत्पादन रोकेर जलाशयको सफाइ गरिँदैछ। जलाशयका दुई गेट खोलेर पानी खाली गर्ने काम शुरु भएको छ।
बाढीले जाली थुनिएपछि सफाइ
बाढीका कारण जलाशयमा गेग्रान भरिएपछि जाली नै थुनिएको छ। गेग्रानले पानीको बहावलाई अवरुद्ध पारेकाले बाँधस्थलका दुईवटा ढोका खोलेर सफाइ थालिएको हो।
४५६ मेगावाट क्षमताको उक्त केन्द्रको जलाशय यसअघि पनि बाढीका कारण आकस्मिक रूपमा फ्लसिङ गर्दा विद्युत उत्पादन बन्द गर्नुपरेको थियो।
नदी किनारमा सजग रहन आग्रह
जलाशय सफाइका क्रममा तामाकोशी नदीमा पानीको बहाव उतारचढाव हुनसक्ने भएकाले नदीतटीय क्षेत्रमा नजान र माछा मार्न नजान सार्वजनिक सूचना जारी गरिएको छ। माथिल्लो तामाकोशी जलविद्युत केन्द्रका निमित्त प्रबन्धक पूर्णगोपाल रञ्जितले आइतबार तामाकोशी नदी आसपास सतर्कता अपनाउन आग्रह गरिएको बताए।
उनका अनुसार आइतबार दिनभर जलाशय सफा गरेर बेलुका ६ बजेपछि पुनः विद्युत उत्पादन सुचारु गरिनेछ। सामान्यतया वर्षेनी दुई पटक जलाशय सफा गर्ने गरिए पनि यसपालि बाढीले गेग्रान चाँडै भरिदिएकाले आपत्कालीन सफाइ गर्नुपरेको उनले बताए।
