काठमाडौँ। मन्त्रिपरिषद्ले सुनसरी र सिरहाका हालैका आन्दोलनका क्रममा ज्यान गुमाएका चार जनालाई शहीद घोषणा गरेको छ। साथै, विद्युतीय एम्बुलेन्स र शववाहनका लागि कर छुट, एनसेल सेयर कारोबारसम्बन्धी प्रतिवेदन सार्वजनिक गर्नेलगायतका निर्णय पनि बैठकले गरेको छ।
सरकारका प्रवक्ता तथा शिक्षामन्त्री सस्मित पोखरेलले मंगलबार बसेको मन्त्रिपरिषद् बैठकका निर्णयहरू सार्वजनिक गरे। उनका अनुसार सुनसरीका ओमप्रकाश मेहता, जयप्रकाश मेहता र रवीन्द्रकुमार मेहता तथा सिरहाका गणेशकुमार यादवलाई शहीद घोषणा गरिएको हो।
विद्युतीय सवारीमा कर छुट
बैठकले स्वास्थ्य क्षेत्रसँग सम्बन्धित महत्त्वपूर्ण निर्णयसमेत गरेको छ। नेपालमा आयात हुने वा स्वदेशमै उत्पादन हुने विद्युतीय एम्बुलेन्स र शववाहनलाई स्वच्छ पूर्वाधार लगानी शुल्क र मूल्य अभिवृद्धि करबाट पूर्ण छुट दिने निर्णय भएको छ।
त्यस्तै, पोर्चुगल सरकारको तर्फबाट काठमाडौँमा कन्सुलर कार्यालय खोल्ने विषयमा गरिएको अनुरोधलाई पनि मन्त्रिपरिषद्ले स्वीकृति दिएको छ। वैदेशिक रोजगार बोर्डको कार्यकारी निर्देशकमा भने बाराका निर्मलकुमार उप्रेती नियुक्त भएका छन्।
एनसेल प्रतिवेदन सार्वजनिक
विवादित एनसेल सेयर कारोबारका सन्दर्भमा मन्त्रिपरिषद्ले अध्ययन तथा अनुसन्धान समितिको प्रतिवेदन सार्वजनिक गर्ने निर्णय गरेको छ। पूर्वमहालेखापरीक्षक टंकमणि शर्मा डंगोलको नेतृत्वमा गठित समितिले तयार पारेको २०८० सालको प्रतिवेदन एनसेलको सेयर खरिदबिक्रीसम्बन्धी विषयमा सार्वजनिक गरिनेछ।
