काठमाडौंको भृकुटीमण्डपमा मंगलबारदेखि नेपाल मोबिलिटी एक्स्पो २०२६ सुरु भएको छ। यस एक्स्पोमा ५३ अटोमोबाइल ब्रान्डको सहभागिता रहेको छ भने ४० भन्दा बढी नयाँ सवारी साधन तथा मोबिलिटी उत्पादनहरू प्रदर्शनमा राखिएका छन्।
नेपाल अटोमोबाइल आयातकर्ता तथा निर्माता संघ (नाइमा)को आयोजनामा भएको यो एक्स्पो छ दिनसम्म चल्नेछ। आयोजकका अनुसार अगस्ट १६ सम्म चल्ने एक्स्पोमा १८ नयाँ दुईपाङ्ग्रे र २९ नयाँ चारपाङ्ग्रे ब्रान्डका सवारी साधन सहभागी छन्। विभिन्न किसिमका सवारी साधन र मोबिलिटी उत्पादनलाई एकै छानामुनि ल्याइएको छ।
उद्घाटन समारोहमा प्रहरी महानिरीक्षकको जोड
एक्स्पोको उद्घाटन गर्दै नेपाल प्रहरीका महानिरीक्षक धनबहादुर कार्कीले यातायात क्षेत्रलाई थप व्यवस्थित बनाउन नियामक निकाय र सरोकारवालाहरूबीच समन्वय आवश्यक रहेको बताए। उनका अनुसार यसले देशको आर्थिक विकासमा टेवा पुर्याउनेछ।
यातायात तथा मोबिलिटी क्षेत्रको विकासका लागि यस्ता प्रदर्शनीहरू कोसेढुङ्गा बन्न सक्ने उनको भनाइ छ। साथै उनले सडक सुरक्षा, ट्राफिक व्यवस्थापन र सवारी अनुशासनमा सुधार गर्नुपर्नेमा पनि जोड दिए।
आयोजक तथा सरोकारवालाको धारणा
नाइमाका अध्यक्ष रितु सिंह वैद्यले एक्स्पोले एकै स्थानमा विभिन्न सवारी साधनका मोडेलहरू प्रदर्शन गर्ने मञ्च उपलब्ध गराएको बताइन्।
नेपाल उद्योग वाणिज्य महासंघका अध्यक्ष अन्जन श्रेष्ठ, नेपाल उद्योग परिसंघका अध्यक्ष वीरेन्द्र राज पाण्डे, नेपाल राष्ट्रिय यातायात व्यवसायी महासंघका अध्यक्ष पूर्णप्रसाद सिटौला र नेपाल चेम्बर अफ कमर्सका अध्यक्ष कमलेश अग्रवालले पनि यातायात क्षेत्रलाई थप व्यवस्थित र अनुशासित बनाउनुपर्नेमा जोड दिए।
