रोल्पाको थबाङ गाउँपालिका-५ मा बुधबार राति अविरल वर्षापछि आएको पहिरोमा परी मृत्यु हुनेको सङ्ख्या तीन पुगेको छ। नेपाल प्रहरीका अनुसार कोटालबारामा पहिरोले घर र पशुशाला पुरिँदा तीन जनाको मृत्यु भएको हो।
मृतकमा १८ वर्षीया शान्ति पुन मगर, ६० वर्षीय कमलबहादुर पुन मगर र ७१ वर्षीय मनराखी पुन मगर रहेका छन्।
नौ जना बेपत्ता
पहिरोमा परी नौ जना अझै बेपत्ता रहेको प्रहरीले जनाएको छ। बेपत्ता हुनेमा ४० वर्षीया जुनकुमारी पुन मगर, ९ वर्षीय अशिम पुन मगर, ६ वर्षीय अशोक पुन मगर, ७५ वर्षीय दलबहादुर पुन मगर, ८० वर्षीय अजम्बर पुन मगर, ७८ वर्षीय बलबहादुर पुन मगर, ७२ वर्षीय लिलबहादुर पुन मगर, ७१ वर्षीय मनि पुन मगर र ६७ वर्षीय हस्तकला रोका मगर छन्।
खोजी तथा उद्धार जारी
बेपत्ताको खोजीका लागि सुरक्षाकर्मी र स्थानीयवासी परिचालित भइरहेको प्रहरीले बताएको छ। जिल्लाका सुरक्षा प्रमुखसहितको टोली पनि घटनास्थल पुगेको छ।
पहिरोमा परी २२ वर्षीय हिमाल पुन मगर र २५ वर्षीय सञ्जय घर्ती मगर घाइते भएका छन्। उनीहरूको उपचार भइरहेको छ।
छ घर पुरिएको प्रारम्भिक अनुमान
प्रहरीको प्रारम्भिक अनुमानअनुसार पहिरोले यस क्षेत्रका छ वटा घर पुरेको छ। स्थानीय अधिकारीका अनुसार यो बस्ती रोल्पा–बागलुङ सिमानाबाट नजिकै छ र जिल्ला सदरमुकामबाट करिब २१ कोशको दूरीमा अवस्थित छ।
क्षतिको विवरण सङ्कलन र बेपत्ताको खोजीको काम जारी रहेको प्रहरीले जनाएको छ।
