काठमाडौं, अगस्ट १३ । प्युठानको स्वर्गद्वारी नगरपालिकाका मादी र लुङ्ग्री नदी किनारका विभिन्न स्थानबाट बिहीबार बिहान पाँच जनाका अज्ञात शव भेटिएका छन्। नेपाल प्रहरीका अनुसार ती शव नगरपालिकाका फरक स्थानबाट बिहान करिब ७:३० बजे फेला परेका थिए।
शव भेटिएका स्थान
स्वर्गद्वारी–९ जुदापन्तामा मादी नदीको किनारमा करिब १२ देखि १३ वर्षका एक बालकको शव भेटिएको छ। वडा नं. ३ को किमिचौरमा मादी नदी किनारबाट कम्मरदेखि माथिल्लो भाग मात्र रहेको एक अज्ञात पुरुषको शव फेला परेको प्रहरीले जनाएको छ।
त्यस्तै, वडा नं. ४ को गोठीबाङमा मादी नदी किनारबाट एक महिलाको शव भेटिएको छ। वडा नं. ५ को सरोजामा लुङ्ग्री नदीको किनारबाट थप दुई महिलाका शव फेला परेका छन्। तीमध्ये एउटा शवको बायाँ खुट्टाको घुँडामुनिको भाग नभएको अवस्थामा रहेको बताइएको छ।
पहिचान र अनुसन्धान
भेटिएका शवको पहिचान हुन नसकेको र मृत्युको कारण यकिन नभएको प्रहरीले बताएको छ। शवहरूको पहिचान गर्ने र घटनाको परिस्थिति पत्ता लगाउने प्रयास जारी रहेको जिल्ला प्रहरी कार्यालय प्युठानले जनाएको छ।
आफन्त बेपत्ता भएका व्यक्तिहरूलाई जिल्ला प्रहरी कार्यालय प्युठानमा सम्पर्क गर्न आग्रह गरिएको छ। सम्पर्कका लागि प्रहरीले ९८५७८३७०४९ र ९८५७८१५५५५ नम्बरहरू सार्वजनिक गरेको छ।
