नेपाल र दक्षिण कोरियाबीचको व्यापारिक सम्बन्ध विस्तार गर्ने उद्देश्यले ललितपुरमा आगामी आइतबार एक अन्तरक्रिया कार्यक्रम हुँदैछ । नेपाल–कोरिया उद्यमी व्यवसायी संघले पुल्चोकस्थित द प्लाजामा ‘नेपाल–कोरिया व्यावसायिक अन्तरक्रिया कार्यक्रम २०२६’ आयोजना गर्न लागेको हो । कार्यक्रम दिउँसो १ बजेबाट सुरु हुनेछ ।
सो कार्यक्रमको केन्द्रीय विषय ‘नेपाल–कोरिया व्यावसायिक अवसर, चुनौती र रिटर्नी उद्यमीको भूमिका’ रहने आयोजकले बताएको छ । यसमा दुई देशबीचको आर्थिक तथा व्यावसायिक सम्बन्ध, लगानीका सम्भावना, उद्यमशीलता र कोरियाबाट फर्केर स्वदेशमा उद्यम गर्ने नेपालीको भूमिकाबारे छलफल हुनेछ ।
सहभागी को–को ?
कार्यक्रममा ग्लोबल आइएमई बैंकका अध्यक्ष चन्द्रप्रसाद ढकाल, नेपाल तथा दक्षिण कोरियाका व्यवसायी, उद्यमी र विभिन्न क्षेत्रका प्रतिष्ठित व्यक्तित्व सहभागी हुनेछन् । नेपाल सरकारका उच्चपदस्थ प्रतिनिधि, दक्षिण कोरियाका कूटनीतिक प्रतिनिधि, उद्योगी–व्यवसायी, रिटर्नी उद्यमी र बैंक तथा वित्तीय संस्थाका प्रतिनिधिलाई समेत बोलाइएको छ ।
कोरियामा रोजगारी तथा व्यावसायिक अनुभव बटुलेर नेपाल फर्किएकाहरूले सञ्चालन गरेका उद्यम, उनीहरूको समस्या र राज्यबाट अपेक्षित सहयोगबारे पनि कार्यक्रममा छलफल हुने संघले जनाएको छ ।
कार्यक्रमको उद्देश्य
नेपाल र दक्षिण कोरियाबीचको आर्थिक तथा व्यावसायिक सहकार्यलाई अझ बलियो बनाउन र दुवै देशबीच लगानी तथा व्यापारका अवसर पहिचान गर्न कार्यक्रम आयोजना गर्न लागिएको हो । आयोजकको विश्वासमा यसले नेपालमा लगानीको वातावरण फराकिलो बनाउन, दुई देशका व्यवसायीबीच सम्बन्ध स्थापित गर्न र सहकार्यका नयाँ बाटो खोल्न मद्दत पुग्नेछ ।
