काठमाडौं, १५ अगस्ट । नेपाल टेलिकमको खुद नाफा गत आर्थिक वर्षमा ४७.५८ प्रतिशतले बढेको छ । सरकारी स्वामित्वको दूरसञ्चार कम्पनीको खुद नाफा रु ८ अर्ब ८६ करोड पुगेको कम्पनीले सार्वजनिक गरेको अपरिस्कृत वित्तीय विवरणमा उल्लेख छ ।
आर्थिक वर्ष २०२५/२६ को चौथो त्रैमासको तथ्यांकअनुसार कम्पनीको खुद नाफा अघिल्लो वर्षको सोही अवधिको रु ६ अर्बबाट बढेर रु ८ अर्ब ८६ करोड पुगेको हो । त्यसैगरी कर अगाडिको नाफा ३४.६६ प्रतिशतले बढेर रु १३ अर्ब २६ करोड पुगेको छ, जुन अघिल्लो आवको यसै अवधिमा रु ९ अर्ब ८५ करोड थियो ।
वित्तीय सूचक
कम्पनीको ब्याज, कर, घिसाइ र ऋण भुक्तानीअघिको आम्दानी (इबिटिडीए) १०.७३ प्रतिशतले बढेर रु २० अर्ब ४८ करोड पुगेको छ । अघिल्लो वर्ष यो रु १८ अर्ब ५० करोड रहेको थियो ।
सञ्चालन आम्दानी ३.१२ प्रतिशतले बढेर रु ३४ अर्ब ९५ करोड पुगेको छ । अघिल्लो आवको तुलनामा सञ्चालन आम्दानी रु ३३ अर्ब ८९ करोड रहेकोमा सुधार भएको हो । कुल आम्दानी पनि २.६५ प्रतिशतले बढेर रु ३९ अर्ब २० करोड पुगेको छ, जुन अघिल्लो वर्ष रु ३८ अर्ब १९ करोड थियो । कम्पनीको वार्षिक प्रतिसेयर आम्दानी रु ४९.२५ रहेको छ ।
ब्याज आम्दानी घट्दा पनि मुख्य दूरसञ्चार सेवाबाट भएको आम्दानी, विशेषगरी जीएसएम सेवाको आम्दानी बढेकाले नाफा र सञ्चालन आम्दानीमा सुधार देखिएको हो । जीएसएम सेवाबाट हुने आम्दानी रु ६४ करोड ५४ लाखले बढेको छ, जुन अघिल्लो वर्षको तुलनामा २.२८ प्रतिशत बढी हो । तर, ब्याजदर घट्दै गएपछि कम्पनीको ब्याज आम्दानी भने रु ८६ करोड १९ लाखले घटेको छ, जुन अघिल्लो वर्षको तुलनामा २२.८८ प्रतिशत कम हो ।
विस्तार, प्राथमिकता र चुनौती
दुर्गम तथा व्यावसायिक रूपमा कम सम्भाव्य क्षेत्रमा पनि नेटवर्क विस्तार र सेवाको गुणस्तर सुधारलाई कम्पनीले आफ्नो जिम्मेवारीका रूपमा लिएको छ । यस्ता क्षेत्रमा सेवा विस्तार गर्दा सञ्चालन खर्च बढ्ने र प्रतिफल तुलनात्मक रूपमा कम हुने कम्पनीको भनाइ छ ।
सेवाको गुणस्तर वृद्धि, नयाँ प्रविधिको विस्तार र दुर्गम क्षेत्रमा दूरसञ्चार पहुँच बढाउने विषयलाई प्राथमिकतामा राखिएको कम्पनीले जनाएको छ । बढ्दो प्रतिस्पर्धाबीच विद्यमान ग्राहकलाई कायम राख्ने र डाटा तथा डिजिटल सेवाको प्रयोग बढाउने कार्य भने प्रमुख चुनौती र अवसरका रूपमा रहेको बताइएको छ ।
