भारतीय सेनाध्यक्ष जनरल धीरज सेथ चार दिने औपचारिक भ्रमणका लागि आइतबार काठमाडौं आइपुगेका छन्। नेपाली सेनाध्यक्ष जनरल अशोक राज सिग्देलको निमन्त्रणामा उनी नेपाल आएका हुन्। उनको पाँच सदस्यीय टोलीलाई त्रिभुवन अन्तर्राष्ट्रिय विमानस्थलमा उप-सेनाध्यक्ष लेफ्टिनेन्ट जनरल प्रदीप जंग केसीले स्वागत गरेका थिए।
काठमाडौं आइपुगेपछि भारतीय सेनाध्यक्ष सेथले नेपालका लागि भारतीय राजदूत नवीन श्रीवास्तवसँग भेटवार्ता गरेका छन्।
सोमबार हुने मुख्य कार्यक्रम
नेपाली सेनाका अनुसार राष्ट्रपति रामचन्द्र पौडेलले सोमबार आयोजना हुने विशेष समारोहमा जनरल सेथलाई नेपाली सेनाको मानार्थ र्यांक प्रदान गर्नेछन्। सोमबार नै नेपाली सेनाको मुख्यालयमा जनरल सेथ र जनरल सिग्देलबीच द्विपक्षीय भेटवार्ता हुने कार्यक्रम पनि रहेको छ।
१९५० देखि कायम परम्परा
दुई देशका सेनाध्यक्षहरूबीच एकअर्कालाई मानार्थ र्यांक प्रदान गर्ने अभ्यास सन् १९५० देखि सुरु भएको हो। यसलाई दुवै पक्षले आफ्नो दीर्घकालीन सैन्य सम्बन्धको प्रतीकका रूपमा लिने गरेका छन्।
द्विपक्षीय सहकार्य र सम्बन्ध विस्तार
यस भ्रमणले दुई देशबीचको रक्षा तथा सुरक्षा सहकार्य अझ सुदृढ हुने अपेक्षा गरिएको छ। नेपाली सेनाले दुई मुलुकका सेनाबीचको उच्चस्तरीय आदानप्रदानले दीर्घकालीन सम्बन्ध कायम राख्न सहयोग पुर्याएको जनाएको छ। दुवै पक्षबीच संयुक्त सैन्य अभ्यास, तालिम र अनुभव आदानप्रदानका माध्यमबाट पनि सम्बन्ध निरन्तर रहेको छ।
भारतीय दूतावासले यो भ्रमण दुई देशबीचको दीर्घकालीन र विशिष्ट रक्षा साझेदारीको अर्को कोसेढुङ्गा भएको उल्लेख गरेको छ।
