काठमाडौंको भृकुटीमण्डपमा भएको NAIMA Nepal Mobility Expo 2026 मा प्रोटोन इलेक्ट्रिक एसयूभीका दुई मोडलले ग्राहकको विशेष चासो पाएका छन्। प्रोटोनको आधिकारिक वितरक जगदम्बा मोटर्सले एक्स्पोमा e.MAS 5 र e.MAS 7 प्रदर्शनीमा राखेको थियो।
एक्स्पोको हल बीको स्टल एल–६ मा यी दुवै मोडल राखिएका थिए। अगस्ट ११ देखि १६ सम्म चलेको एक्स्पोमा अवलोकनकर्ताहरूले गाडीको विशेषता, मूल्य, स्वामित्व र बुकिङ विकल्पबारे जानकारी लिएका थिए।
e.MAS 5 र e.MAS 7 का मूल्य तथा सुविधा
कम्प्याक्ट विद्युतीय एसयूभीका रूपमा रहेको e.MAS 5 प्राइम र प्रिमियम गरी दुई भेरियन्टमा उपलब्ध छ। यसको मूल्य क्रमशः रु ३२.९९ लाख र रु ३६.९९ लाख तोकिएको छ।
यो मोडलमा रियर–व्हील ड्राइभ प्लेटफर्म, १४.६ इन्च डिस्प्ले, ३७५ लिटर बुट स्पेस, भेहिकल–टु–लोड (V2L) प्रविधि र जी–ट्र्याक्सन कन्ट्रोल प्रणाली रहेको बताइएको छ।
ठूलो आकारको विद्युतीय एसयूभीका रूपमा राखिएको e.MAS 7 पनि प्राइम र प्रिमियम भेरियन्टमा उपलब्ध छ। यसको मूल्य क्रमशः रु ४९.९९ लाख र रु ५९.९९ लाख छ।
e.MAS 7 को प्राइम भेरियन्टमा १६० किलोवाटको इलेक्ट्रिक मोटर र ४९.५२ किलोवाट आवरको लिथियम आइरन फस्फेट ब्याट्री रहेको छ। यसले WLTP मापनअनुसार करिब ३४५ किलोमिटरको रेन्ज दिन्छ। साथै, उन्नत चालक सहायता प्रणाली र १५.४ इन्च डिस्प्ले पनि यस मोडलमा छ।
ग्राहकको आवश्यकता अनुसारका मोडल
जगदम्बा मोटर्सका अनुसार यी दुई मोडल फरक ग्राहकको आवश्यकतालाई लक्षित गरेर ल्याइएका हुन्। e.MAS 5 लाई सहरी क्षेत्रका लागि कम्प्याक्ट एसयूभीका रूपमा राखिएको छ भने e.MAS 7 बढी स्थान र लामो दूरीका लागि उपयुक्त हुनेगरी ल्याइएको हो।
NAIMA एक्स्पोमा सहभागी हुन नपाएका ग्राहकहरूले NADA Auto Show 2026 का क्रममा हल ४ को स्टल जी–१५ मा गएर यी गाडी अवलोकन गर्न सक्ने कम्पनीले जनाएको छ। उक्त अवसरमा ग्राहकका लागि थप विशेष छुट तथा प्याकेजसमेत घोषणा गरिएको छ।
