अर्घाखाँचीको सन्धिखर्क नगरपालिकाले आफ्नै तहबाट थालेको करदाता सेवा प्रवाहले स्थानीय सेवाग्राही लाभान्वित भएका छन् । नगरपालिकाबाटै करसम्बन्धी सेवा उपलब्ध हुन थालेपछि सेवाग्राहीले सहज, छिटो तथा झन्झटमुक्त सेवा पाउन थालेका हुन् । सन्धिखर्क नगरपालिकामा तीन हजार पाँच सयभन्दा बढी करदाता सेवाग्राही रहेको बताइएको छ ।
गत जेठ १२ गतेदेखि करदाता सेवा प्रवाह सुरु भएको थियो । जेठ १२ गतेदेखि साउन मसान्तसम्म विभिन्न प्रकृतिका १६० फर्म तथा करदाताले सेवा प्राप्त गरेको नगरपालिकाका सूचना प्रविधि अधिकृत विशाल महतले जानकारी दिए । यस अवधिमा ३९ व्यवसाय प्यान र ३३ व्यक्तिगत प्यान जारी भएका छन् । त्यस्तै, ४३ फर्मले व्यवसाय प्यान बन्द गरेका छन् भने १८ फर्मले कारोबार संशोधन तथा प्रतिलिपि लिइसकेका छन् । २७ फर्मले करचुक्ता प्रमाणपत्रसमेत प्राप्त गरेको अधिकृत महतको भनाइ छ ।
नगर प्रमुख कृष्णप्रसाद श्रेष्ठले स्थानीय सरकार नागरिकको घरदैलोमै सेवा पुर्याउने उद्देश्यले कर सेवा सञ्चालन गरिएको बताए । सामान्य करसम्बन्धी सेवा लिन टाढा जानुपर्ने बाध्यताको अन्त्य भएको र आगामी दिनमा थप प्रविधिमैत्री, छिटो र प्रभावकारी सेवा विस्तार गरिने उनले जानकारी दिए ।
स्थानीय तहबाट कर सेवा सुरु भएसँगै नगरपालिकाप्रति नागरिकको विश्वास अझ मजबुत बनेको प्रमुख प्रशासकीय अधिकृत प्रमोद खनालले बताए । नगरपालिकाले सेवा प्रवाहलाई थप व्यवस्थित बनाउँदै करदातामैत्री वातावरण सिर्जना गर्ने लक्ष्य लिएको छ ।
विगतमा भने सामान्य करसम्बन्धी सेवाका लागि सेवाग्राहीहरू कपिलबस्तुको कृष्णनगरसम्म पुग्नुपर्ने अवस्था थियो ।
