नेपालका लागि बंगलादेशी राजदूत मोहम्मद शफिकुर रहमानले नेपाल र बंगलादेशबीच वार्षिक 'बंगलादेश-नेपाल सांस्कृतिक तथा सिर्जनात्मक आदानप्रदान कार्यक्रम' सुरु गर्न प्रस्ताव गरेका छन्। दुई देशबीचको जनस्तरको सम्बन्ध र सांस्कृतिक सहकार्यलाई प्रगाढ बनाउने उद्देश्यले उनले यस्तो प्रस्ताव राखेका हुन्।
बुधबार काठमाडौंको दरबार वर्गमा 'ब्युटिफुल बंगलादेश' अन्तर्राष्ट्रिय फोटो प्रदर्शनी २०२६ को उद्घाटन समारोहलाई सम्बोधन गर्दै राजदूत रहमानले प्रस्तावित कार्यक्रममा दुवै देशका फोटोग्राफर, चलचित्रकर्मी, संगीतकार, कलाकार, लेखकलगायत सांस्कृतिक क्षेत्रका साधकहरू सहभागी हुन सक्ने बताए। उनले दुवै देशमा पालैपालो संयुक्त प्रदर्शनी, सांस्कृतिक प्रस्तुति, चलचित्र महोत्सव, फोटो आदानप्रदान तथा कार्यशाला आयोजना गर्न सुझाव दिए।
यो प्रदर्शनी नेपाल फोटो पत्रकार मञ्च र बंगलादेश फोटो पत्रकार संघको संयुक्त आयोजनामा भएको हो। बंगलादेश-नेपाल फोटो पत्रकार आदानप्रदान कार्यक्रमअन्तर्गत आयोजित प्रदर्शनी विश्व फोटो दिवसकै अवसरमा गरिएको बताइएको छ।
राजदूत रहमानले बंगलादेशको प्राकृतिक सौन्दर्य, सांस्कृतिक सम्पदा, ऐतिहासिक स्थलहरू र जनजीवनलाई देखाउन फोटोग्राफी प्रभावकारी माध्यम भएको बताए। नेपाल र बंगलादेशबीच सांस्कृतिक तथा भाषिक समानता रहेको उल्लेख गर्दै उनले पर्यटक आदानप्रदान र जनस्तरको सम्पर्क विस्तारलाई द्विपक्षीय सम्बन्धको महत्वपूर्ण आधारका रूपमा चित्रण गरे।
दुवै देशका फोटो पत्रकार संघहरूलाई दुवै मुलुकका पर्यटकीय आकर्षणबारे संयुक्त पर्यटन प्रवर्द्धनका पहल अघि बढाउन उनले आग्रह गरे। सांस्कृतिक सम्पदा र पर्यटकीय गन्तव्यको प्रवर्द्धनका लागि डिजिटल प्लेटफर्म र समसामयिक सञ्चार माध्यमको उपयोग बढाउन पनि उनले आह्वान गरे।
काठमाडौंस्थित बंगलादेशी दूतावासले यस्ता पहलहरूलाई सक्दो सहयोग गर्ने उनले बताए। कार्यक्रममा नेपाल पर्यटन बोर्ड, चाइनिज कल्चरल सेन्टरका अधिकारी तथा नेपाल र चीनका अन्य गणमान्य व्यक्तिहरूको सहभागिता रहेको थियो।
