चालु आर्थिक वर्षको पहिलो महिना साउनमा मुलुकमा भित्रिएको वस्तु तथा सामानको मूल्य एक खर्ब ८७ अर्ब ४४ करोड ३६ लाख २२ हजार रुपैयाँ पुगेको छ । भन्सार विभागले सार्वजनिक गरेको तथ्यांकअनुसार गत आर्थिक वर्षको साउनको तुलनामा आयात ३१ दशमलव ०४ प्रतिशतले बढेको हो । गत आवको सोही महिनामा एक खर्ब ४३ अर्ब चार करोड छ लाख ६९ हजार रुपैयाँ बराबरको वस्तु भित्रिएको थियो ।
यसै अवधिमा विदेशी बजारमा ३८ अर्ब ७० करोड ४१ लाख ४६ हजार रुपैयाँ बराबरका वस्तु तथा सामान निर्यात भएका छन् । विभागका अनुसार गत आवको साउनको तुलनामा निर्यात ६१ दशमलव ७२ प्रतिशतले बढेको हो । गत आवको साउनमा २३ अर्ब ९३ करोड २४ लाख ४१ हजार रुपैयाँ बराबरको वस्तु निर्यात भएको थियो ।
आयात र निर्यात दुवैतर्फ उल्लेख्य वृद्धि देखिए पनि आयातको आधार ठूलो भएकाले व्यापार अन्तर कायमै छ । भन्सार विभागको तथ्यांकअनुसार आयातको तुलनामा निर्यात निकै कम देखिन्छ ।
