७ भदौ, म्याग्दी । एकीकृत सेवा कार्यालय म्याग्दीले गत आर्थिक वर्ष २०८२/८३ मा सञ्चालन गरेका पर्यटन पूर्वाधार आयोजनाबाट जिल्लाका विभिन्न क्षेत्रमा चार दशमलव १९ किलोमिटर पदमार्ग निर्माण भएको छ ।
कार्यालयका अनुसार सो अवधिमा पर्यटन पूर्वाधार निर्माणसँग सम्बन्धित २४ वटा योजनाका लागि रु एक करोड ४० लाख बजेट विनियोजन गरिएको थियो । सो मध्ये रु एक करोड १० लाख लागतका १९ वटा योजना पूरा भएका हुन् । प्रतिकूल भूगोल, मौसम र अन्य कारणवश रु ३० लाख बजेटका पाँच वटा योजना भने कार्यान्वयन हुन सकेनन् ।
कार्यालय प्रमुख सम्झेर घर्ती क्षेत्रीले सम्पन्न योजनामार्फत पर्यटकीयस्थलहरूमा पक्की र कच्ची पदमार्ग, विश्रामस्थल, आश्रयस्थल तथा पर्खालजस्ता संरचना निर्माण भएको बताए । उनका अनुसार सबै योजना उपभोक्ता समितिमार्फत कार्यान्वयन गरिएको हो । पूर्वाधार तयार भएसँगै पर्यटक, स्थानीयवासी तथा पर्यटन क्षेत्रमा काम गर्ने मजदुरको आवतजावत सहज भएको छ ।
निर्माण भएका पदमार्गमध्ये मालिका गाउँपालिका–७ बिमको डाडागाउँमा ५२० मिटर पक्की पदमार्ग र प्रभुचेला धार्मिक स्थलमा तीन कोठे आश्रयस्थल छन् । मालिका–४ को गौखेरेबाट मतौका चनौटे र वडा नम्बर ३ को लामखोरिया डाडागाउँ जोड्ने पदमार्ग पनि निर्माण भएको छ । बेनी नगरपालिका–९ को ढाडापधेरा आरोटा, पाखाथर र ८ को बराहपाखोमा पदमार्ग बनेका छन् भने १ को सनातन धार्मिक आश्रम र २ को लभ्लीहिलमा घेराबार गरिएको छ ।
यस्तै, मङ्गला गाउँपालिका–४ को गम्फाधुरी र धवलागिरी गाउँपालिका–४ को खिवाङ–चेचुङ क्षेत्रमा पदमार्ग निर्माण सम्पन्न भएको छ । रघुङ्गा गाउँपालिका–३ को गलेश्वरदेखि बगैचा, ५ र ६ को फुलडाडामा पदमार्ग तथा ३ को गायत्री मन्दिरमा सत्तल निर्माण भएका छन् । अन्नपूर्ण गाउँपालिका–४ को नारच्याङ झरना, ७ को टिकोटबाट सोबन्ध, १ मारका, ६ चित्रे हुँदै घान्द्रुक देउराली र ३ को फगाम–सुवा–दुवारी–मतिचौर जोड्ने पदमार्ग पनि तयार भएका छन् ।
चालु आर्थिक वर्ष २०८३/८४ का लागि गण्डकी प्रदेश सरकारले म्याग्दीका २४ वटा योजनामा रु एक करोड ८५ लाख बजेट विनियोजन गरेको छ । बजेट प्राप्त योजनाको सर्वेक्षण, लागत अनुमान तयार गरी उपभोक्ता समिति गठन गर्ने काम भइरहेको कार्यालयका इञ्जिनियर सुमन बोगटीले जानकारी दिए ।
