चालु आर्थिक वर्षमा हिमाल आरोहणका लागि प्रदान गरिएको अनुमतिबापत सरकारले ३३ करोड ४२ लाख ३४ हजार २२६ रुपैयाँ राजस्व संकलन गरेको छ। यस अवधिभर ४८ वटा हिमालका लागि गरी १८८ टोलीलाई आरोहण अनुमति दिइएको थियो।
संकलित राजस्वमध्ये सबैभन्दा ठूलो हिस्सा मनास्लुको रहेको छ। सो हिमालका लागि अनुमति लिएका ४३ टोलीका ५०० जनाबाट मात्र २२ करोड ५८ लाख ५७ हजार १८९ रुपैयाँ उठेको छ। दोस्रो स्थानमा रहेको आमादब्लमतर्फ ४७६ आरोही रहेका छन्, जसबाट ७ करोड १३ लाख ४७ हजार १०० रुपैयाँ सलामी दस्तुर संकलन भएको छ।
अन्य हिमालबाट उठेको राजस्व यस्तो छ :
धौलागिरि–१ आरोहणका ३७ जनाबाट ८४ लाख ७३ हजार ६५० रुपैयाँ,
हिम्लुङ आरोहण दलका १३० जनाबाट ७९ लाख ७४ हजार २० रुपैयाँ,
मकालु आरोहण गर्ने तीन आरोहीबाट ६ लाख ८८ हजार ५० रुपैयाँ।
आरोहण अनुमति तथा सलामी दस्तुरबापत उठेको उक्त रकम राज्यकोषमा दाखिला गरिएको छ।







