नेपाल अटोमोबाइल एसोसिएसन (नाडा) ले बुधबार काठमाडौंको भृकुटीमण्डप प्रदर्शनी केन्द्रमा सुरु हुन लागेको १८औं नाडा अटो सो २०२६ का सबै तयारी पूरा गरेको छ। नाडाले मंगलबार दिएको जानकारीअनुसार प्रदर्शनीमा २१५ भन्दा बढी स्टल स्थापना गरिएका छन्।
आयोजकका अनुसार यसपटक स्टलहरू अघिल्ला वर्षहरूको तुलनामा बढी फराकिलो र व्यवस्थित तरिकाले मिलाइएको छ। प्रदर्शनीमा चार पांग्रे सवारी, दुई पांग्रे सवारी, वित्तीय संस्था, अटो पार्ट्स र ग्यारेज उपकरणलाई मुख्य क्षेत्रका रूपमा राखिएको छ। साथै 'मेड इन नेपाल/मेड फर नेपाल' र 'अन्तर्राष्ट्रिय व्यापार' प्याभिलियन पनि रहेका छन्।
यस पटक ५३ सवारी ब्रान्ड, ७० अटो पार्ट्स तथा सेवा कम्पनी र करिब ११ बैंक तथा वित्तीय संस्थाहरू प्रदर्शनीमा सहभागी हुँदैछन्। आगन्तुकले सवारी साधन, वित्त व्यवस्थापन र बीमाका साथै बिक्रीपछिको सेवा र अटो पार्ट्ससम्बन्धी जानकारी प्राप्त गर्न सक्नेछन्।
प्रदर्शनी स्थललाई ह्वीलचेयरमैत्री बनाइएको छ र प्रकाश, एयर कन्डिसन तथा फ्यानको व्यवस्था गरिएको छ। आगन्तुकका लागि नेपाल पुलिस क्लबको भुइँतलाको पार्किङ क्षेत्र र सुन्धारास्थित नेसनल ट्रेडिङ परिसरमा पार्किङको व्यवस्था गरिएको छ।
प्रदर्शनी बुधबार बिहान १०:३० बजेदेखि खुला हुनेछ। उपराष्ट्रपति रामसहायप्रसाद यादवले उद्घाटन गर्ने कार्यक्रम तय गरिएको छ। प्रदर्शनीको टिकट खल्ती एप र आधिकारिक क्यूआर कोडमार्फत पाउन सकिनेछ। सर्वसाधारणका लागि प्रवेश शुल्क २०० रुपैयाँ र विद्यार्थीका लागि १५० रुपैयाँ तोकिएको छ।
आयोजकले ट्राफिक व्यवस्थापन तथा मिडिया डेस्क, क्याफेटेरिया र आपत्कालीन स्वास्थ्य सेवाको व्यवस्था गरेका छन्। सुरक्षाका लागि सिसिटिभी निगरानी र आगलागी नियन्त्रण प्रणाली पनि स्थापना गरिएको छ।
