रसुवाको बाढीले सिर्जना गरेको विपत्का बीच अमेरिकी राष्ट्रपति डोनाल्ड ट्रम्पले नेपाललाई आवश्यक पर्ने सबै प्रकारको सहयोग गर्ने प्रतिबद्धता व्यक्त गरेका छन्। उनले अमेरिकी प्रशासन नेपालको नेतृत्वसँग सम्पर्कमा रहेको र विपद्का बेला आवश्यक सहयोगका लागि तयार रहेको बताएका हुन्।
एनबीसी न्यूजका अनुसार बिहीबार ह्वाइट हाउसमा लेक ओन्टारियोको नाम परिवर्तनसम्बन्धी कार्यकारी आदेशमा हस्ताक्षर गर्न आयोजित समारोहपछि सञ्चारकर्मीलाई संक्षिप्त प्रतिक्रिया दिँदै ट्रम्पले यस्तो बताएका हुन्। सो क्रममा उनले भने, ‘हामीले नेपाललाई फोन गरेका छौं र उनीहरूलाई आवश्यक पर्ने जुनसुकै सहयोग उपलब्ध गराउने प्रस्ताव गरेका छौं । नेपालको नेतृत्वसँग हाम्रो राम्रो सम्बन्ध छ।’
ट्रम्पले बाढीले पुर्याएको क्षतिलाई ‘असाधारण’ भनेका छन्। शक्तिशाली हिलो र पानीको बहावले बलिया तथा पक्की भवनलाई समेत ‘टुथपिक’ जस्तै बगाएको उनको भनाइ थियो। नेपाललाई सहयोग पठाइरहेको जानकारी गराउँदै उनले आवश्यक परेको जुनसुकै सहयोग गर्ने प्रतिबद्धता दोहोर्याएका छन्।
अमेरिकी नागरिकको उद्धार प्राथमिकता
ट्रम्पले बाढी प्रभावित क्षेत्रमा करिब ५० देखि ६० अमेरिकी नागरिक प्रभावित भएको हुनसक्ने अनुमान गरेका छन्। प्रभावित अमेरिकी नागरिकको पूर्ण विवरण भने अझै प्राप्त नभएको उनले बताए। तर अमेरिकी समाचार संस्था सीएनएनले विदेश मन्त्रालयलाई उद्धृत गर्दै बाढीपछि नेपालमा ९० अमेरिकी नागरिक बेपत्ता रहेको जनाएको छ।
पूर्व ह्वाइट हाउस प्रेस सचिव करोलिन लेभिटले नेपालमा रहेका अमेरिकी नागरिकको सुरक्षा अमेरिकी प्रशासनको तत्कालीन प्राथमिकता रहेको बताइन्। उनका अनुसार अमेरिकी सरकारले नेपाललाई सहयोग र सहायता प्रस्ताव गरिसकेको छ र राष्ट्रपति ट्रम्प तथा विदेशमन्त्री मार्को रुबियोको पहिलो प्राथमिकता नेपालमा रहेका अमेरिकी नागरिकको उद्धार हो।
अमेरिकाद्वारा पाँच लाख डलर सहायता घोषणा
अमेरिकी विदेश मन्त्रालयले रसुवा बाढीको विपद्को अवस्था नजिकबाट निगरानी गरिरहेको जनाएको छ। राहत तथा उद्धार कार्यमा सहयोग गर्न विपद् प्रतिक्रिया विज्ञहरूलाई नेपाल पठाइएको मन्त्रालयले जानकारी दिएको छ। साथै बाढीमा ज्यान गुमाएकाका परिवार र प्रभावित सबैप्रति मन्त्रालयले गहिरो समवेदना व्यक्त गरेको छ।
अमेरिकाले क्याथोलिक रिलिफ सर्भिसेसमार्फत पाँच लाख अमेरिकी डलर बराबरको आपत्कालीन सहायता उपलब्ध गराउने घोषणा गरेको छ। यो रकम बाढी प्रभावित समुदायका लागि आपत्कालीन आश्रय, राहत सामग्री, खानेपानी, सरसफाइ तथा स्वच्छतासम्बन्धी सहयोगमा खर्च गरिनेछ।
विदेश मन्त्रालयका अनुसार काठमाडौंस्थित अमेरिकी दूतावासले स्थानीय अधिकारीसँग समन्वय गरी प्रभावित क्षेत्रमा रहेका अमेरिकी नागरिकको खोजी तथा सहयोग गरिरहेको छ। तत्काल सहयोग आवश्यक पर्ने अमेरिकी नागरिकलाई दूतावासमा सम्पर्क गर्न आग्रह गरिएको छ। त्यस्तै, प्रभावित क्षेत्रमा रहेकाहरूलाई स्थानीय अधिकारीको निर्देशन पालना गर्न, स्थानीय समाचारमा ध्यान दिन तथा आपत्कालीन सूचनाका लागि स्मार्ट ट्राभलर इनरोलमेन्ट प्रोग्राम (STEP) मा दर्ता हुन पनि भनिएको छ।
