रसुवाको भोटेकोशी बाढीपछि बगाएर चितवनसम्म आइपुगेका १०३ अज्ञात शव आइतबार देवघाटस्थित वन क्षेत्रमा गाडिएका छन्। पहिचान हुन नसकेपछि ती शवको व्यवस्थापन गरिएको हो।
चितवन जिल्ला प्रहरी कार्यालयका प्रमुख एसपी रमेश्वर पौडेलले बाढीपछि जिल्लामा हालसम्म २७२ शव भेटिएको जानकारी दिए। उनका अनुसार तीमध्ये १० जनाको पहिचान भई आफन्तलाई बुझाइसकिएको छ भने बाँकी १०३ शवको चिह्न र विवरण संरक्षण गरी गाडिएको छ।
शव गाडिसकिए पनि भविष्यमा डीएनए परीक्षणबाट पहिचान खुले आफन्तले शव दाबी गर्न सक्ने अधिकारीहरूले बताएका छन्। त्यस्तो अवस्थामा आफन्तले प्रशासनसँग समन्वय गरेर शव बाहिर निकाल्न र लैजान सक्नेछन्।
लामो समयसम्म शव खुला राख्दा स्वास्थ्य तथा वातावरणीय जोखिम निम्तिन सक्ने भएकाले गाड्ने निर्णय गरिएको जनाइएको छ। भविष्यमा खोजी र पहिचानका लागि शवका चिह्न, विवरण र अन्य सान्दर्भिक सूचना अभिलेखमा राखिएको छ।
