रसुवामा गएको बाढी विपद्मा मृत्यु हुनेको सङ्ख्या ९०३ पुगेको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरण (एनडीआरआरएमए) ले सोमबार बिहान ९ बजे सार्वजनिक गरेको विवरणअनुसार अझै ४,२४७ जना बेपत्ता रहेका छन्।
विपद्मा परी २६७ जना घाइते भएका छन्, जसमध्ये १४६ जनाको उपचार सकिएर डिस्चार्ज भइसकेको प्राधिकरणले जनाएको छ। जिल्ला विपद् आपत्कालीन कार्य सञ्चालन केन्द्रको तथ्याङ्कअनुसार रसुवामा ८६५ र नुवाकोटमा १,५५८ जना बेपत्ता छन्। त्यस्तै, हाइड्रोपावर आयोजनाका थप ९३३ कामदार पनि बेपत्ता सूचीमा छन्।
बेपत्ता हुनेमध्ये नेपाल प्रहरीका २५, नेपाली सेनाका ४५, सशस्त्र प्रहरी बलका १३, भन्सारका १५ र अध्यागमनका तीन अधिकृत रहेका छन्। यस्तै, ५९२ विदेशी नागरिक र पर्यटकसँगै रहेका १२७ नेपाली पनि बेपत्ता छन्। लाङ्टाङ राष्ट्रिय निकुञ्जका तीन जना र क्वारेन्टाइन कार्यालयका तीन जना बेपत्ताको सूचीमा छन्।
प्राधिकरणका अनुसार हालसम्म १०,४५१ जनाको उद्धार गरिएको छ। नेपाली सेनाले हवाई मार्गबाट २५२ विदेशी नागरिक र ३,३४४ नेपालीलाई उद्धार गरेको छ। आइतबार सेनाले हाइड्रोपावर आयोजनाबाट १५ चिनियाँ र सात भारतीय नागरिकलाई निकालेको थियो। उद्धार अभियानमा हालसम्म ४११ हेलिकप्टर उडान भएका छन्, जसमध्ये सोमबार मात्रै १७ उडान समावेश छन्।
उद्धार तथा राहत कार्यका लागि २०,८०० भन्दा बढी सुरक्षाकर्मी परिचालित छन्। तीमध्ये नेपाली सेनाका ८,७२२, नेपाल प्रहरीका ७,८९४ र सशस्त्र प्रहरी बलका ४,२०३ जना रहेको प्राधिकरणले बताएको छ।
राहत वितरण र आर्थिक सहयोग
प्रभावित क्षेत्रमा राहत सामग्री पुर्याउन ३७ ट्रक, ३५ बोलेरो र आठ हेलिकप्टर उडान प्रयोग गरिएको छ। सोमबार उत्तरगया र धुन्चेमा दुई टन खाद्यान्न, औषधि, स्वास्थ्य सामग्री र पाँच पोर्टेबल जेनेरेटर पठाइएको छ। नुवाकोटमा १६ सवारी र हेलिकप्टरमार्फत राहत पुर्याइएको छ।
सरकारले रसुवा र नुवाकोटलाई एक/एक करोड रुपैयाँ, धादिङलाई ५ करोड रुपैयाँ र प्रभावित १५ स्थानीय तहलाई ६ करोड ७५ लाख रुपैयाँ नगद राहत वितरणका लागि विनियोजन गरेको छ। प्रभावित क्षेत्रमा हाल २५,००० लिटर डिजेल, २१,००० लिटर पेट्रोल र १०,००० लिटर उड्डयन इन्धन रहेको छ।
विपद्का कारण ज्यान गुमाएका व्यक्तिको पहिचानका लागि शवहरू विभिन्न २१ अस्पतालमा राखिएको छ। डीएनए परीक्षणबाट शवको पहिचान गरिने प्राधिकरणले जनाएको छ। त्यसैगरी, घटनापछि छ वटा सर्जिकल मेडिकल टोली परिचालन गरिएको छ।
