फ्रान्स सरकारले १५ वर्षमुनिका बालबालिकालाई सामाजिक सञ्जाल प्रयोग गर्न रोक लगाउने नयाँ कानूनी प्रस्ताव अघि सारेको छ । राष्ट्रपति इमानुएल म्याक्रोनले सोमबार परिमार्जित मस्यौदाबारे युरोपेली आयोगलाई जानकारी गराइसकिएको बताउँदै सो प्रतिबन्ध आगामी वर्ष लागू हुने अपेक्षा व्यक्त गर्नुभएको छ ।
पेरिसबाट प्राप्त जानकारीअनुसार यसअघि बनेको कानून संवैधानिक परिषद्ले खारेज गरेपछि सरकारले कानूनी तथा प्राविधिक सुधार गरेर नयाँ मस्यौदा तयार पारेको हो । संवैधानिक परिषद्ले गत अगस्टमा उक्त कानूनका केही प्रावधानले नागरिकको अभिव्यक्ति स्वतन्त्रतामाथि आवश्यकभन्दा बढी हस्तक्षेप गरेको ठहर गर्दै ती प्रावधान बदर गरेको थियो ।
सामाजिक सञ्जालको प्रयोगले बालबालिका तथा किशोरकिशोरीमा पर्न सक्ने नकारात्मक असर रोक्ने विषय म्याक्रोनको प्रमुख प्राथमिकतामध्ये एक रहेको छ । आफ्नो राष्ट्रपति कार्यकाल सकिनुअघि नै यो व्यवस्था कार्यान्वयनमा आउने उहाँको अपेक्षा छ ।
युरोपभर समान व्यवस्थाको आग्रह
युरोपेली सङ्घका अन्य सदस्य राष्ट्रमा पनि बालबालिकालाई सामाजिक सञ्जालको जोखिमबाट जोगाउने समान प्रावधान लागू गर्न म्याक्रोनले आग्रह गर्दै आउनुभएको छ । नयाँ प्रस्ताव युरोपेली सङ्घको कानूनसँग मेल खान्छ वा खाँदैन भन्ने सुनिश्चित गर्न आयोगलाई जानकारी दिइएको हो ।
यसै साता ब्रसेल्समा हुने सम्बोधनमा युरोपेली आयोगकी अध्यक्ष उर्सुला भोन डेर लेयनले बालबालिकाका लागि युरोपेली सङ्घभर सामाजिक सञ्जालमा लगाउन सकिने सम्भावित प्रतिबन्धबारे आफ्नो धारणा सार्वजनिक गर्ने अपेक्षा गरिएको छ ।
बालबालिकामाथि सामाजिक सञ्जालको नकारात्मक प्रभावबारे चिन्ता बढेसँगै विभिन्न देशले यसको पहुँच सीमित गर्ने कदम चालिरहेका छन् ।
