काठमाडौं । फिफाको निलम्बनमा परेको अखिल नेपाल फुटबल संघ (एन्फा) ले आफूमाथिको प्रतिबन्ध फुकुवा गर्नुपर्ने माग राख्दै मंगलबार राष्ट्रिय खेलकुद परिषद् (राखेप) मा ज्ञापनपत्र बुझाउने र धर्नामा बस्ने भएको छ ।
एन्फा कर्मचारी, रेफ्री तथा प्रशिक्षकसमेतको टोली राखेप पुगेर ज्ञापनपत्र बुझाउने कार्यक्रम रहेको महासचिव किरण राईले जानकारी दिए । एन्फाको निलम्बन फुकुवा र साफ प्रतियोगिता खेल्न पाउने–नपाउने विषय आपसमा जोडिएको भन्दै राईले फुटबलका समस्या समाधानका लागि ज्ञापनपत्र बुझाउन लागिएको बताए ।
ज्ञापनपत्र बुझाएपछि राखेप परिसरमा एक घण्टा धर्ना दिने र त्यसपछि पत्रकार सम्मेलन गर्ने तयारी एन्फाले गरेको छ । कर्मचारीहरूसँगको छलफलपछि ज्ञापनपत्र तथा धर्नाको कार्यक्रम तय भएको संघले जनाएको छ ।
फिफाको निलम्बन
तेस्रो पक्षको हस्तक्षेप भएको भन्दै फिफाले गत १० असारमा एन्फालाई निलम्बन गरेको थियो । सो निलम्बनका कारण नेपाली फुटबल शून्य अवस्थामा पुगेको छ ।
निलम्बन हटाउनका लागि सरकारले कुनै पहल नगरेको दाबी एन्फा नेतृत्वको छ । सोही विषय उठाउँदै संघले राखेपमा ज्ञापनपत्रसहित धर्ना कार्यक्रम घोषणा गरेको हो ।
