काठमाडौं । रसुवाको भोटेकोशी नदीमा आएको बाढीले क्षति पुर्याएका झोलुंगे पुलमध्ये १२ वटाको मर्मत काम सुरु भएको छ । प्रधानमन्त्री तथा मन्त्रिपरिषद्को कार्यालयका अनुसार बाढीबाट बिग्रिएका ती पुलको मर्मत जारी छ र असोज २० गतेभित्र सञ्चालनमा ल्याउने लक्ष्यसहित कामलाई तीव्र बनाइएको छ ।
कार्यालयका अनुसार भोटेकोशी बाढीबाट पुगेको क्षतिपछि पहिचान भएका पुलमध्ये १२ वटामा मर्मतको काम थालिएको हो । यी पुलले जोड्ने पहाडी बस्तीका बासिन्दालाई आवतजावतमा सहजता फर्काउने अपेक्षा गरिएको छ ।
मर्मत भइरहेका पुलहरू
मर्मत सुरु भएका पुलमध्ये धादिङतर्फ कालिकास्थान, मालिङ्गा मझुवाटार दोभान, महादेवा मास्टर, चिरौँदी खोला, शीतलबजार–क्युरेनीटार र बेल्खु–भुतिया झोलुंगे पुल रहेका छन् ।
यसैगरी नुवाकोट र धादिङ जोड्ने केउरेनी गहते, पिमलटार जागाराम, कोतपु कल्लेरी, फोस्रेटार र फिलिङ झोलुंगे पुलको मर्मत पनि अघि बढेको छ । गोरखा र धादिङ जोड्ने बादरे झोलुंगे पुलमा पनि मर्मत कार्य सुरु भइसकेको प्रधानमन्त्री कार्यालयले जनाएको छ ।
थप ८ पुलको तयारी, ३३ पुलको बोलपत्र
बाढीबाट प्रभावित थप ८ झोलुंगे पुलको मर्मतका लागि आवश्यक प्राविधिक तथा प्रशासनिक तयारी अघि बढेको कार्यालयले बताएको छ । मर्मतमा चाहिने डेकलगायत सामग्री खरिदका लागि विभिन्न निर्माण कम्पनीसँग सम्झौता भई पहिलो चरणको सामग्री कार्यस्थलमा पुगिसकेको र दोस्रो चरणको स्टिल पार्ट्स खरिद प्रक्रिया अघि बढाइएको कार्यालयको भनाइ छ ।
यसैबीच मर्मत गर्नै नसकिने गरी क्षति पुगेका ३३ झोलुंगे पुलको पुनर्निर्माणका लागि भदौ १७ गते बोलपत्र आह्वान भइसकेको प्रधानमन्त्री कार्यालयले जनाएको छ । यी पुलको पुनर्निर्माण प्रक्रिया अघि बढेसँगै बाढी प्रभावित क्षेत्रमा पुनः सञ्चार सम्भव हुने अपेक्षा छ ।
