आईसीसीले सार्वजनिक गरेको नयाँ ओडीआई बलिङ वरियतामा नेपाली स्पिनरद्वय ललित राजवंशी र सन्दीप लामिछानेले आफ्नो स्थान माथि उकासेका छन् । बाँयाहाते स्पिनर ललित पाँच स्थान सुधार गर्दै ४०औं स्थानमा पुगेका छन् भने लेग स्पिनर सन्दीप तीन स्थान सुधार गर्दै ४६औं स्थानमा छन् ।
मंगलबारसम्मको प्रदर्शनलाई आधार मानेर आईसीसीले बुधबार अद्यावधिक गरेको वरियताअनुसार ललितको रेटिङ अंक ५०९ पुगेको छ । सन्दीपको रेटिङ अंक ४९१ रहेको छ ।
गत शनिबार सम्पन्न एसीसी प्रिमियर लिगमा उनीहरूले देखाएको प्रदर्शनका कारण वरियतामा सुधार भएको हो । सो प्रतियोगितामा नेपालले खेलेको ओमानसँगको सेमिफाइनल र यूएईसँगको फाइनल ओडीआई मान्यताप्राप्त खेल थिए ।
ती दुवै खेलमा ललितले समान दुई–दुई विकेट लिएका थिए । सन्दीपले भने ओमानविरुद्ध तीन र यूएईविरुद्ध एक विकेट हात पारेका थिए ।
यी नतिजासँगै ओडीआई बलिङ वरियताको शीर्ष क्रममा नेपाली स्पिनरहरूको उपस्थिति थप बलियो बनेको छ ।
