नेपाली कांग्रेसको देउवा समूहद्वारा गठित ‘१५औं महाधिवेशन आयोजक समिति’का संयोजक डा. शशांक कोइरालाले आफूले मानेको विश्वासमा अडिग रहन सक्नु नै राजनीतिको मुख्य आधार भएको बताएका छन् । शनिबार काठमाडौं क्षेत्र नम्बर ४ मा आयोजित समूहको क्षेत्रीय अधिवेशन उद्घाटन गर्दै उनले यस्तो धारणा राखेका हुन् ।
कोइरालाका भनाइमा राजनीतिमा सत्यको बाटोमा उभिनु मात्र पर्याप्त हुँदैन । सत्यमा अडिरहँदा बेहोर्नुपर्ने मूल्य चुकाउन पनि तयार हुनुपर्छ भन्ने उनको भनाइ थियो ।
राजनीतिको प्रयोजन सत्ताको भोग विलास नभई जनताको सेवा हो भन्दै उनले सत्ताको दुरूपयोग गर्ने व्यक्तिहरू राजनीतिमा प्रवेश गर्नु नहुने पनि स्पष्ट पारे ।
पूर्वमहामन्त्री समेत रहेका कोइरालाले मूल्य–मान्यता तथा विधि–पद्धतिको राजनीति पछि पर्दै गई सत्ता, शक्ति र पैसा हाबी हुन थालेपछि निर्वाचनहरू महङ्गो बन्दै गएको औंल्याए ।
