नेपाली कांग्रेसका नवनिर्वाचित सभापति गगन कुमार थापाले पार्टीबाट चित्त नबुझाई बाहिरिएका साथीहरूलाई पुनः कांग्रेसमा फर्काउने प्रतिबद्धता जनाएका छन्। शनिबार सम्पन्न १५ औं महाधिवेशनबाट सभापतिमा निर्वाचित भएलगत्तै पार्टी केन्द्रीय कार्यालयमा आयोजित कार्यक्रममा सम्बोधन गर्दै उनले यस्तो बताएका हुन्।
थापाका अनुसार पार्टी छाडेर जानेमा नेता मात्रै छैनन्। वर्षौंसम्म कांग्रेसलाई माया गरेका लाखौं समर्थक र शुभचिन्तक पनि केही वर्षयता पार्टीको कामबाट सन्तुष्ट हुन सकेनन् र टाढा भए। ती सबैलाई फर्काउने आफ्नो यात्राको पहिलो लक्ष्य रहेको उनले जनाए।
असन्तुष्ट साथीहरू फर्किंदा पार्टीको कार्यालय, पार्टीको घर र पार्टीको परिवारप्रति नै फर्किन मन लाग्ने वातावरण बनाउने संकल्प उनले व्यक्त गरे। यही संकल्पका साथ नयाँ कार्यकालको यात्रा सुरु गर्ने उनको भनाइ छ।
थापाले अब आफूहरूले काम गर्ने तरिका नै परिवर्तन गर्ने पनि बताए। कार्यशैली बदलेर सबैभन्दा पहिले आफूसँग रहेका साथीहरूको भरोसालाई अझ माथि उठाउने उनले प्रतिबद्धता जनाए। सभापति निर्वाचित भएपछि पार्टी कार्यालयमा भेला भएका नेता तथा कार्यकर्तालाई सम्बोधन गर्दै उनले यस्तो धारणा राखेका थिए।
