तनहुँको ऋषिङ गाउँपालिका–१ मा निर्माणाधीन १४० मेगावाट क्षमताको तनहुँ जलविद्युत् आयोजनाको भूमिगत विद्युतगृहसहित प्रमुख संरचना बनाउने काम अन्तिम चरणमा पुगेको छ । आयोजनाको प्याकेज–२ मा समेटिएको विद्युतगृह, सुरुङ तथा सम्बन्धित उपकरण जडानको प्रगति करिब ८० प्रतिशत पुगेको आयोजनाले जनाएको छ ।
यो प्याकेज चीनको सिनो हाइड्रो कर्पोरेसनले निर्माण गरिरहेको छ । आयोजना प्रमुख श्यामजी भण्डारीका अनुसार भूमिगत संरचना निर्माणका लागि गरिने उत्खननको काम सकिइसकेको छ भने धेरैजसो संरचनाको सिभिल निर्माण सम्पन्न भएको छ ।
मुख्य सुरुङको लाइनिङ अन्तिम चरणमा
भूमिगत विद्युतगृह, टेलरेस सुरुङ, केबल सुरुङ, सर्ज साफ्ट, इन्टेक तथा ड्राफ्टट्युब सुरुङ र पेनस्टकको ब्याकफिल कङ्क्रिटिङजस्ता मुख्य संरचनामा उत्खनन र कङ्क्रिटिङको काम झन्डै सकिएको छ । मुख्य सुरुङमा कङ्क्रिट लाइनिङ गर्ने काम पनि अन्तिम चरणमा रहेको आयोजना प्रमुख भण्डारीले बताए ।
सिभिल संरचना बन्दै गर्दा विद्युत् उत्पादनका लागि आवश्यक उपकरण जडानको काम पनि समानान्तर रूपमा अघि बढाइएको छ । भूमिगत विद्युतगृहमा जेनेरेटर, टर्बाइन, सिसीटिभी, ट्रान्सफर्मरलगायत इलेक्ट्रोमेकानिकल उपकरण राख्ने र परीक्षण गर्ने क्रम जारी रहेको उनले जानकारी दिए ।
यसैगरी वातावरणीय बहावका लागि बनाइने विद्युतगृह र बाँध सञ्चालन भवनको निर्माण पनि जारी छ । भूमिगत विद्युतगृह तथा सुरुङका अधिकांश सिभिल संरचना तयार हुँदै गर्दा उपकरण जडान र परीक्षणलाई पनि सँगसँगै अघि बढाइएको आयोजनाले उल्लेख गरेको छ ।
प्याकेज–२ अन्तर्गतका संरचना र उपकरणको काम पूरा भएपछि आयोजनाको विद्युत् उत्पादन प्रणाली सञ्चालन गर्न आवश्यक पूर्वाधार तयार हुनेछ ।
