यमपञ्चकको तेस्रो दिन गाई तिहारका अवसरमा दाङको बेलझुण्डीस्थित गौशालामा रहेका ६०० भन्दा बढी गाईको सामूहिक पूजा गरिएको छ । सोमबार योगी आदित्यनाथ फाउन्डेसनद्वारा सञ्चालित उक्त गौशालामा स्थानीयवासीको सहभागितामा सामूहिक गाईपूजा सम्पन्न भएको हो ।
फाउन्डेसनका अध्यक्ष भोलानाथ योगीका अनुसार गाई तिहारको दिन गौशालामै बसेर सामूहिक पूजा गर्ने परम्परा हरेक वर्ष निभाइँदै आएको छ । यस वर्ष पनि सोही परम्पराअनुसार पूजा गरिएको उनले बताए ।
गाईपूजाकै दिन गौशालामा लक्ष्मीको हवन पूजासमेत गरिएको थियो । साथै विभिन्न दाताले गाईका लागि खाना उपलब्ध गराएका थिए ।
विश्वविद्यालयको जग्गा भाडामा लिएर गौशाला सञ्चालनमा ल्याइएको छ । अध्यक्ष योगीका अनुसार गौशाला चलाउन निकै चुनौती छन् र गाईगोरुको खानपान व्यवस्थापनमा समस्या पर्ने गरेको छ । विभिन्न दाताको सहयोगकै भरमा गौशाला सञ्चालन भइरहेको उनको भनाइ छ ।
