अस्ट्रेलियाको सिड्नी अन्तर्राष्ट्रिय विमानस्थलमा यात्रुको मोबाइल फोन जाँचका क्रममा बाल यौन शोषणसँग सम्बन्धित सामग्री भेटिएपछि प्रहरीले २७ वर्षीय एक युवकविरुद्ध अभियोग लगाएको छ।
प्रहरीका अनुसार गत नोभेम्बर ८ मा विमानस्थलमा गरिएको फोन परीक्षणका क्रममा ती सामग्री फेला परेका थिए। त्यसपछि घटनाबारे थप अनुसन्धान अघि बढाइएको प्रहरीले जनाएको छ।
अनुसन्धानका क्रममा न्यु साउथ वेल्स (एनएसडब्ल्यू) प्रहरीसँगको सहकार्यमा दक्षिण–पश्चिम सिड्नीस्थित एक निवासमा खानतलासी गरिएको थियो। सो क्रममा थप विद्युतीय उपकरणहरू बरामद गरिएका छन्, जसलाई फरेन्सिक परीक्षणका लागि पठाइएको प्रहरीले जानकारी दिएको छ।
पीडितविहीन अपराध होइन
प्रहरीले बाल यौन दुर्व्यवहारसम्बन्धी सामग्रीलाई पीडित नहुने अपराधका रूपमा हेर्न नमिल्ने स्पष्ट पारेको छ। यस्तो प्रत्येक तस्बिर वा भिडियोको पछाडि दुर्व्यवहार र शोषणमा परेका बालबालिकाको पीडा जोडिएको प्रहरीको भनाइ छ।
बालबालिकामाथि हुने यौन शोषणसँग सम्बन्धित सामग्रीको उत्पादन, भण्डारण र प्रसार गम्भीर अपराध भएको उल्लेख गर्दै प्रहरीले यस्ता गतिविधिविरुद्धको अनुसन्धान र कारबाही जारी रहने बताएको छ।
आरोपितमाथिको अनुसन्धान अझै जारी रहेको छ। अदालतबाट दोषी ठहर नभएसम्म आरोपितलाई निर्दोष मानिने अस्ट्रेलियाली कानुनी सिद्धान्त यस प्रकरणमा पनि लागू हुने वकिलहरूको जिकीर छ।
