सवारी चालक अनुमतिपत्र (स्मार्ट लाइसेन्स) छपाइको लामो ब्याकलग अन्त्य भएपछि अब नयाँ आवेदकले २४ घण्टाभित्रै लाइसेन्स पाउने भएका छन् । सूचना तथा सञ्चार मन्त्रालयले बिहीबार जारी गरेको प्रेस विज्ञप्तिअनुसार यातायात व्यवस्था विभागबाट विवरण प्राप्त भएको २४ घण्टाभित्रै छपाइ गरी उपलब्ध गराइनेछ ।
ब्याकलग अन्त्य, २७ लाख लाइसेन्स छपाइ सम्पन्न
मन्त्रालय, सुरक्षण मुद्रण केन्द्र र यातायात व्यवस्था विभागबीच दुई चरणमा भएको सम्झौताअनुसार कुल २७ लाख स्मार्ट लाइसेन्स छाप्ने कार्य सम्पन्न भएको छ । पहिलो चरणमा १२ कात्तिक २०८२ मा भएको सम्झौताअनुसार १२ लाख लाइसेन्स छापिएको थियो भने दोस्रो चरणमा ४ वैशाख २०८३ मा गरिएको सम्झौताअनुसार थप १५ लाख लाइसेन्स छापिएको हो । दोस्रो चरणको काम ३२ असार २०८३ मा सकिएसँगै सम्पूर्ण ब्याकलग अन्त्य भएको मन्त्रालयले जनाएको छ ।
हाल सुरक्षण मुद्रण केन्द्रले दैनिक रूपमा यातायात व्यवस्था विभागबाट प्राप्त हुने करिब ३ देखि ५ हजार विवरणका आधारमा २४ घण्टाभित्र नै स्मार्ट लाइसेन्स छापेर विभागलाई हस्तान्तरण गरिरहेको छ । यसले नयाँ लाइसेन्स वितरण प्रक्रियालाई छिटो र व्यवस्थित बनाएको छ ।
स्वदेशमै सुरक्षण मुद्रण: बचत र रोजगारी
सुरक्षण मुद्रण केन्द्रमार्फत अब सातै प्रदेश सरकार तथा यातायात मन्त्रालयसँग समन्वय गरी सवारी चालक अनुमतिपत्र छपाइसम्बन्धी सम्झौता गर्ने तयारी भइरहेको छ । साथै, नागरिकता, राष्ट्रिय परिचयपत्र, अन्तःशुल्क स्टिकर, हुलाक टिकट तथा जग्गाधनी प्रमाणपत्रलगायत अन्य सुरक्षण मुद्रण सामग्री पनि स्वदेशमै उत्पादन गर्ने योजना रहेको मन्त्रालयले जनाएको छ ।
यी सामग्री स्वदेशमै उत्पादन हुन थालेपछि विदेशिने करोडौँ रुपैयाँ बचत हुने, स्वदेशभित्रै पुँजी परिचालन हुने र रोजगारी सिर्जना हुने मन्त्रालयको भनाइ छ । यसले गुणस्तरीय सार्वजनिक सेवा प्रवाहमा पनि योगदान पुग्ने अपेक्षा गरिएको छ ।