जल तथा मौसम विज्ञान विभागले काठमाडौं उपत्यकामा बागमती नदीको बहाव सतर्कता तहभन्दा माथि पुगेको जनाएको छ। गौरीघाट जलमापन केन्द्रमा नदीको पानीको सतह दुई दशमलव ४१ मिटर पुगेको छ, जुन सतर्कता तह (दुई दशमलव एक मिटर) भन्दा माथि हो।
विभागका अनुसार नदीको बहाव अझै बढ्दो क्रममा रहेकाले नदी आसपासका डुबान भइरहने क्षेत्रमा विशेष सावधानी अपनाउन आग्रह गरिएको छ। नदीको पानीको सतह दुई दशमलव सात मिटर पुगेमा खतरा तह मानिने विभागका बाढीविद् विनोद पराजुलीले बताएका छन्।
विभागले नदी किनार, डुबान भइरहने बस्ती तथा तल्लो तटीय क्षेत्रका बासिन्दालाई सोमबार बिहानसम्म उच्च सतर्कता अपनाउन अनुरोध गरेको छ। साथै, अनावश्यक आवतजावत नगर्न, आवश्यक परे सुरक्षित स्थानमा सर्न, तथा विभागबाट जारी बाढी र पहिरोसम्बन्धी सूचनाको नियमित पालना गर्न पनि भनिएको छ।
