काठमाडौं — केही दिनदेखि परेको वर्षा र मौसममा व्याप्त बादलपछि आज बिहान उपत्यकाको आकाश खुलेको छ। बिहानैदेखि पारिलो घाम लाग्दा उत्तरी हिमशृङ्खला र वरपरका डाँडाकाँडा स्पष्ट देखिएका छन्। हरियालीले ढाकिएका डाँडाहरू वर्षापछिको सफा वातावरणमा झन् आकर्षक देखिएका छन्।
जल तथा मौसम विज्ञान विभागका अनुसार मनसुनी प्रणाली सक्रिय रहे पनि बिहीबार बिहान उपत्यकामा वर्षा नभएकाले मौसम केही खुलेको हो। तर, मौसमविद्हरूले दिउँसो वा साँझतिर स्थानीय रूपमा बादल विकास हुँदै केही स्थानमा वर्षा हुन सक्ने सम्भावना रहेको जनाएका छन्।
मौसम खुलेसँगै सर्वसाधारणले काठमाडौंका विभिन्न स्थानबाट उत्तरी हिमालहरू देख्न पाएका छन्। वर्षाले धुलो–धुवाँ पखालिदिँदा दृश्यता बढेको छ, जसले उपत्यकाको प्राकृतिक सौन्दर्यलाई अझ उजागर गरेको छ। लामो समयपछि हिमालको दृश्य अवलोकन गर्न पाउँदा नागरिकहरू उत्साहित देखिएका छन्।
