नेपाली पर्वतारोही चतुर तामाङले विश्व पर्वतारोहणमा अर्को कीर्तिमानी कायम गरेका छन्। उनले युरोपको सर्वोच्च शिखर माउन्ट एल्ब्रस (५,६४२ मिटर) को दुई सयौं पटक सफल आरोहण गरेका हुन्। शनिबार बिहान ६ः२० बजे (रुसी समय) उक्त शिखरमा पुगेर उनले नेपालको झण्डा फहराएका थिए।
यो उपलब्धि विश्व पर्वतारोहणमा दुर्लभ मानिन्छ। चतुर तामाङले जुलाई २२ मा १९८औं र जुलाई २३ मा १९९औं आरोहण गरेपछि दुई दिनको अन्तरालमा दुई सयौं आरोहण पूरा गरेका हुन्। उनले आफ्नो सम्पूर्ण आरोहण करिअरमा नेपालको झण्डा विश्वका विभिन्न उच्च शिखरमा फहराउँदै आएका छन्।
पृष्ठभूमि र करिअर
सोलुखुम्बुका स्थानीय चतुर तामाङले सन् १९९५ मा व्यावसायिक पर्वतारोहण करिअर सुरु गरेका थिए। उनी सन् २००२ देखि रुसमा बस्दै आएका छन् र त्यहीँ बस्दा माउन्ट एल्ब्रसको दुई सय पटक आरोहण गर्ने लक्ष्य राखेका थिए। हाल उनी नेपाल र रुसबीच समय बाँडेर काम गर्छन्—नेपालमा रुसी पर्वतारोहीलाई हिमाली अभियानमा गाइड गर्ने र काकेससको एल्ब्रसमा अन्तर्राष्ट्रिय पर्वतारोहीलाई नेतृत्व दिने।
तामाङको आरोहणमा माउन्ट एभरेस्ट, ल्होत्से, कञ्चनजङ्घा, चो ओयु, मनास्लु, आमा दब्लम, बरुन्त्से, आइल्यान्ड पिक र मेरा पिक समावेश छन्।
माउन्ट एल्ब्रसको चुनौती
दक्षिणी रुसको काकेसस पर्वतश्रृंखलामा अवस्थित माउन्ट एल्ब्रस एक सुप्त ज्वालामुखी हो। यसलाई युरोपको सबैभन्दा अग्लो हिमाल र सेभेन समिट्समध्ये एक मानिन्छ। यद्यपि यसको मानक मार्ग प्राविधिक रूपमा सरल मानिन्छ, तर मौसमको द्रुत परिवर्तन, भीषण आँधी र उच्च उचाइको अवस्थाले अनुभवी पर्वतारोहीका लागि पनि यसलाई चुनौतीपूर्ण बनाउँछ। चतुर तामाङले यही चुनौतीलाई पटकपटक पार गर्दै दुई सयौं आरोहणको कीर्तिमान स्थापित गरेका हुन्।