काठमाडौंमा अगस्ट ६ देखि ८ सम्म हुने अन्तर्राष्ट्रिय अनुप्रयुक्त मनोविज्ञान सम्मेलन (आईसीएपी २०२६) मा १८ देशका मनोवैज्ञानिक, अनुसन्धानकर्ता, शिक्षाविद्, अभ्यासकर्ता र नीति निर्माता सहभागी हुने भएका छन्। काठमाडौं विश्वविद्यालयसँग आबद्ध राष्ट्रिय कलेजले यो सम्मेलनको आयोजना गर्न लागेको हो।
तीनदिने सम्मेलनको विषयवस्तु “व्यवहार विज्ञानको प्रवर्द्धन: बहुविध तथा सांस्कृतिक परिप्रेक्ष्य” राखिएको आयोजकहरूले बताएका छन्। सम्मेलनमा मानसिक स्वास्थ्य, शिक्षा, कार्यस्थलको कल्याण, सामुदायिक लचिलोपन, सार्वजनिक नीति र दिगो विकासका विषयमा केन्द्रित रहेर छलफल हुनेछ।
उद्घाटन तथा मुख्य वक्ता
काठमाडौं विश्वविद्यालयका उपकुलपति प्रा. डा. रीषिकेश वाग्लेले सम्मेलनको उद्घाटन गर्ने तालिका छ। उद्घाटनपछि विभिन्न मुलुकका मनोवैज्ञानिकहरूले मुख्य सम्बोधन गर्नेछन्। मुख्य वक्ताहरूमा प्रा. डा. पूर्णिमा सिंह (भारत), प्रा. डा. डायन क्यारोल जेलम्यान (अमेरिका), प्रा. डा. अनवारुल हसन सुफी (बंगलादेश), प्रा. डा. हृदयरत्न बज्राचार्य (नेपाल), प्रा. डा. क्याटी फिजगेराल्ड (अमेरिका) र प्रा. (डा.) पायल कँवर चन्देल (भारत) रहेका छन्।
राष्ट्रिय कलेजका प्रिन्सिपल तथा सम्मेलन संयोजक माधव प्रसाद न्यौपानेले आईसीएपी २०२६ ले अन्तर्राष्ट्रिय सहकार्य प्रगाढ बनाउँदै समकालीन मनोवैज्ञानिक तथा सामाजिक चुनौतीहरूको सामना गर्न प्रमाणमा आधारित र सांस्कृतिक रूपले उपयुक्त दृष्टिकोणलाई अगाडि बढाउने बताए।
अनुसन्धानपत्र प्रस्तुति र प्रकाशन
समन्वय सचिव डा. नरेन्द्र सिंह थगुन्नाका अनुसार कार्यक्रममा मुख्य सम्बोधन, प्यानल छलफल, कार्यशाला, संगोष्ठी र अनुसन्धान प्रस्तुति समावेश छन्। सम्मेलनमा ९६ वटा सहकर्मी समीक्षित अनुसन्धानपत्र प्रस्तुत गरिनेछ। ती पत्रहरूले क्लिनिकल तथा परामर्श मनोविज्ञान, न्यूरोसाइन्स, सांगठनिक मनोविज्ञान, शैक्षिक मनोविज्ञान, कृत्रिम बुद्धिमत्ता र मानसिक स्वास्थ्य, खेल मनोविज्ञान, बौद्ध मनोविज्ञान र विपद् व्यवस्थापनलगायत क्षेत्र समेट्नेछन्।
आयोजकहरूका अनुसार सम्मेलनमा प्रस्तुत भएका छनोट पत्रहरू काठमाडौं विश्वविद्यालयको बोधि: एन इंटरडिसिप्लिनरी जर्नल र समृद्धि जर्नल अफ डेभलपमेन्ट स्टडिजसहित सहकर्मी समीक्षित पत्रिका तथा सम्पादित पुस्तकहरूमा प्रकाशित हुनेछन्।
आयोजकहरूले यो सम्मेलनले राष्ट्रिय कलेजको मनोविज्ञानतर्फको शैक्षणिक प्रोफाइल सुदृढ पार्ने र अनुसन्धान, शिक्षा तथा व्यावसायिक विकासमा अन्तर्राष्ट्रिय सहकार्य विस्तार गर्ने अपेक्षा लिएका छन्।