भारतका विभिन्न क्षेत्रमा भारी वर्षाको प्रकोप, झारखण्डमा चट्याङबाट १४ जनाको मृत्यु

भारतका विभिन्न क्षेत्रमा भारी वर्षा, बाढीपहिरो र चट्याङका कारण जनधनको ठूलो क्षति भइरहेको छ। मंगलबार झारखण्डका विभिन्न जिल्लामा चट्याङ परेको थियो, जसबाट कम्तीमा १४ जनाको ज्यान गएको छ र आठ जना घाइते भएका छन्।

मृतकहरूमध्ये नौ जना गिरिडीह जिल्लाका रहेको बताइएको छ भने दुमकाका तीन र लातेहारका दुई जनाले पनि चट्याङका कारण ज्यान गुमाएका छन्। घाइतेहरूको अस्पतालमा उपचार भइरहेको छ र उनीहरूमध्ये कतिपयको अवस्था गम्भीर रहेको चिकित्सकहरूले जनाएका छन्।

जम्मु–कश्मीरका बस्ती डुबानमा

सोमबार राति जम्मु–कश्मीरको शोपियाँ जिल्लास्थित जोरा गाउँमा आएको बाढीले त्यहाँका घर, कृषि जमिन र व्यावसायिक प्रतिष्ठानहरू डुबानमा परेका छन्। यस्तै, उत्तरी कश्मीरको बान्डीपोरा जिल्लास्थित सुमलर क्षेत्रमा बाढीका कारण तीनवटा घरमा क्षति पुगेको छ।

केरलमा २५ जनाको मृत्यु, १८ हजारभन्दा बढी विस्थापित

केरलमा गत १ अगस्टदेखि परेको अविरल वर्षाका कारण बाढीको अवस्था देखिएको छ। राज्य सरकारको तथ्यांकअनुसार वर्षासम्बन्धी घटनामा हालसम्म २५ जनाले ज्यान गुमाइसकेका छन् भने चार जना बेपत्ता छन्। बाढीका कारण हजारौं मानिस घर छाड्न बाध्य भएका छन् र १८ हजारभन्दा बढी प्रभावितलाई राहत शिविरमा राखिएको छ।

पथनमथिट्टा, कोट्टायम र अलप्पुझा जिल्लामा बाढीको असर सबैभन्दा बढी देखिएको छ। निरन्तरको वर्षाका कारण राज्यका धेरै नदी र बाँधमा जलसतह उच्च रहेको बताइएको छ।

उद्धारका क्रममा प्रशिक्षकको मृत्यु

केरलकै बाढी उद्धारका क्रममा पौडी प्रशिक्षक आर. राजेशले गत १ अगस्टमा बाढीमा बगिरहेका ६१ वर्षीय एक व्यक्तिलाई आफ्नो लाइफ ज्याकेट लगाइदिएर उद्धार गरेका थिए। तर उद्धार सकेर फर्कने क्रममा सुरक्षा डोरीबाट उनको हात चिप्लिएपछि तीव्र भेलमा बगेर उनी बेपत्ता भएका थिए। भारतीय सञ्चारमाध्यमहरूले उनको मृत्यु भएको पुष्टि गरेका छन्।

उत्तराखण्ड र हिमाचलमा भारी वर्षाको चेतावनी

भारतीय मौसम विभागले उत्तराखण्डका देहरादून र बागेश्वर जिल्लाका लागि भारी वर्षाको अरेन्ज अलर्ट जारी गरेको छ। प्रदेशका अधिकांश क्षेत्रमा आगामी १० अगस्टसम्म वर्षा जारी रहने अनुमान छ। सम्भावित जोखिमलाई मध्यनजर गर्दै देहरादून र बागेश्वरका कक्षा १२ सम्मका विद्यालयहरूमा बुधबार सार्वजनिक बिदा दिइएको छ।

अविरल वर्षा र पहिराका कारण हिमाचल प्रदेश र उत्तराखण्डमा गरी २५२ वटा सडक अवरुद्ध भएका छन्। तीमध्ये १५३ सडक हिमाचल प्रदेशमा र ९९ सडक उत्तराखण्डमा बन्द रहेका छन्। अधिकारीहरूले प्रभावित क्षेत्रका बासिन्दालाई सतर्क रहन तथा आवश्यक नभएसम्म यात्रा नगर्न आग्रह गरेका छन्।