काठमाडौं — कीर्तिपुरस्थित त्रिवि अन्तर्राष्ट्रिय क्रिकेट मैदान र मूलपानीका दुई मैदानको पिचको स्वरूप फेर्न विकेट पुनर्निर्माण तथा घाँस रोप्ने काम सुरु भएको छ। नेपाल प्रिमियर लिग (एनपीएल) को तेस्रो संस्करण र आईसीसी यू–१९ महिला विश्वकपलाई लक्षित गर्दै तीनवटै मैदानको विकेट तयार पारिँदैछ।
कीर्तिपुरको पिचमा शुक्रबार घाँस रोप्ने काम सकिएको छ। मूलपानीको माथिल्लो मैदानमा पनि घाँस हालिसकिएको छ भने तल्लो मैदानमा घाँस रोप्ने काम जारी छ। तीनवटै मैदानको विकेट निर्माण तथा मर्मतका लागि ७०–८० लाख रुपैयाँ खर्च हुने अनुमान नेपाल क्रिकेट संघ (क्यान) ले गरेको छ।
फ्ल्याट बनेपछि स्पिनर हाबी
एनपीएलको पहिलो संस्करणअघि कीर्तिपुरको विकेट पूरै हरियो बनाइएको थियो। त्यसबेला तीव्र गतिका बलरलाई मदत पुग्ने अपेक्षा सहभागी टोलीले गरेका थिए। फ्रेन्चाइज टोलीहरूले तीव्र गतिका बलरलाई प्राथमिकतामा राखेर टिम निर्माण गरेका थिए। तर प्रतियोगिता सुरु भएको एक साताभित्रै कीर्तिपुरको पिचबाट घाँस हराएको थियो। विकेट फ्ल्याट हुँदै गएपछि स्पिनरहरू हाबी भएका थिए।
पहिलो संस्करणमा सुदूरपश्चिम रोयल्सका स्कट कुग्लेन, चितवन राइनोजका सोहेल तानभिर र रिजन ढकाल, जनकपुर बोल्ट्सका किशोर महतो तथा काठमाडौं गोर्खाजका करण केसीले तीव्र गतिको बलिङमा राम्रो सफलता पाएका थिए। विकेट फ्ल्याट भएपछि भने जनकपुरका ललित राजवंशी, कर्णाली याक्सका विपिन शर्मा र सुदूरपश्चिमका सैफ जैबजस्ता स्पिनर चम्किए। त्यसयता पनि कीर्तिपुरको विकेटमा स्पिनरकै दबदबा कायम छ।
एनपीएल र यू–१९ विश्वकपको तयारी
एनपीएलको तेस्रो संस्करण दसैंपछि हुने बताइएको छ, तर आधिकारिक मिति घोषणा भइसकेको छैन। यस्तै, १६ राष्ट्र सहभागी आईसीसी यू–१९ महिला विश्वकप नेपाल र बंगलादेशले संयुक्त रूपमा आयोजना गर्दैछन्। नेपालका लागि यो सबैभन्दा ठूलो प्रतियोगिता हुनेछ। यू–१९ महिला विश्वकप जनवरीमा हुनसक्ने अनुमान छ। आईसीसीको आधिकारिक तालिका भने आउन बाँकी छ। सहभागी १६ राष्ट्रमध्ये नेपाल र बंगलादेशका मैदानमा ८ टोलीले खेल्ने सम्भावना छ। आयोजकका रूपमा नेपाल सोझै प्रतियोगितामा प्रवेश पाएको छ।
सन् २०२० यता कीर्तिपुरको विकेट नयाँ बनाउन लागिएको हो। यू–१९ महिला विश्वकपकी संयोजकसमेत रहेका क्यान उपाध्यक्ष रोशनकुमार सिंहका अनुसार विकेट निर्माण तथा मर्मतको खर्च क्यानले अहिले आफ्नै स्रोतबाट जुटाइरहेको छ। पछि अन्तर्राष्ट्रिय क्रिकेट परिषद् (आईसीसी) ले सो खर्च बेहोर्ने उनले बताए।
घाँस रोप्ने विधि
कीर्तिपुरमा शुक्रबार बिहानदेखि क्युरेटर मधु तामाङसहित मैदानका कर्मचारी विकेट निर्माणमा खटिएका थिए। नयाँ विकेट बनाउने क्रममा बिग्रेको माटो र जरा निकालेर फालिएको छ भने नयाँ घाँस रोपिएको छ। मूलपानीका दुई मैदानमा भने प्रफुल्ल प्रधान र बंगलादेशका मोहम्मद अब्दुल अल मामुनले क्युरेटरको जिम्मेवारी सम्हालेका छन्।
विकेटमा मैदानको ३० यार्डभित्र उम्रेको घाँस निकालेर रोपिएको हो। पुनः रोपिएको घाँस उम्रन दुई–तीन साता लाग्नेछ। त्यसपछि घाँस काटेर लेभलिङ गर्ने र मल छरेर फेरि उमार्ने काम गरिनेछ। घाँसको जरा चार इन्चसम्म पुग्न करिब चार महिना लाग्न सक्ने बताइएको छ। तर एनपीएल सुरु हुन साढे दुई महिना मात्र बाँकी छ। त्यसैले जरा चार इन्चसम्म पुग्ने सम्भावना कम रहेको सिंहले बताए। तैपनि विकेट राम्रो बन्ने विश्वास क्युरेटरले लिएका छन्।
यसपटक विकेटमा स्थानीय दुबो प्रयोग गरिएको छ। बर्मुडा दुबो भएको भए विकेट अझै केही वर्ष टिक्ने सिंहको भनाइ छ। भदौ लागेसँगै घाँसले जरा फाल्ने काम घट्दै जाने भएकाले मनसुनको पानी धेरै गयो भने विकेटलाई फाइदा पुग्ने उनले बताए। एनपीएल सुरु भएको दुई सातासम्म विकेटमा घाँस रहने सम्भावना छ। त्यसपछि विकेट फ्ल्याट हुन सक्ने उनको आकलन छ।
पूर्वाधार र सुरक्षा व्यवस्था
दसैंअगाडि कीर्तिपुर मैदान मात्र तयार हुनेछ। मूलपानीका दुवै मैदान यू–१९ महिला विश्वकपका लागि तयार पारिँदैछन्। कीर्तिपुरमा ८, माथिल्लो मूलपानीमा ७ र तल्लो मूलपानीमा ६ पिच निर्माण गरिनेछ। कीर्तिपुरमा १२ हजार र तल्लो मूलपानीमा पाँच हजार दर्शक क्षमता रहनेछ। माथिल्लो मूलपानीमा दुई हजार दर्शक क्षमताको अस्थायी टहरा बनाइनेछ।
मैदानभित्रको काम सकिएपछि कीर्तिपुरमा ड्रेसिङ रुम, आइस बाथ, डाइनिङ हल र भीआईपी बक्सको मर्मत गरिनेछ। दर्शक बस्ने कुर्सीमा सिट नम्बर राखिने र मैदानभित्र सहज प्रवेशको वातावरण बनाइने सिंहले बताए। सुरक्षालाई गम्भीर रूपमा लिइएको छ। आईसीसीका प्रतिनिधि आएपछि सुरक्षाका सम्पूर्ण प्रबन्धको तयारी गरिने उनको भनाइ छ।
