राप्रपा अध्यक्ष राजेन्द्रप्रसाद लिङदेनले पार्टीप्रति वफादार र सक्रिय रहेका कार्यकर्ताको राजनीतिक भविष्य आफूले संरक्षण गर्ने बताएका छन्। उनले यस्तो प्रतिबद्धता काठमाडौं महानगरपालिका नगर कमिटीको अधिवेशनलाई शनिबार सम्बोधन गर्दै व्यक्त गरेका हुन्।
सो अवसरमा उनले पार्टी र देशको सेवामा लाग्न चाहने जोकोहीले पनि अवसर नपाउने चिन्ता गर्नुनपर्ने स्पष्ट पारे। कसैलाई पनि राजनीतिक भविष्यको चिन्ताले विचलित हुन नहुने बताउँदै उनले सबैको भविष्य सुरक्षित गर्ने दायित्व आफूले लिएको उल्लेख गरे।
विगतका मतभेद वा आन्तरिक संघर्षले कोही आत्तिनु नपर्ने भन्दै अध्यक्ष लिङदेनले आफू सबैको अभिभावककै भूमिकामा रहेर काम गर्ने प्रतिबद्धता जनाए।
काम नगर्ने र भाग्नेलाई पार्टीमा स्थान छैन
तर, जिम्मेवारीविना पद ओगटिरहने र विपत्तिको बेला पन्छिने कार्यकर्ताका लागि पार्टीमा कुनै ठाउँ नरहने उनले चेतावनी दिए। लडाइँका बेला भाग्नेहरूलाई उनले आफैं पार्टीबाट निकाल्ने समेत बताए। त्यस्तै, काम गर्ने कार्यकर्ताका लागि पार्टीले पूर्ण अवसर दिने उनको भनाइ छ।
सक्रिय सदस्यता अभियानमा केन्द्रित हुन निर्देशन
पार्टीको संगठनात्मक संरचना सबल बनाउन अहिले सक्रिय सदस्यता अभियान जारी रहेको जानकारी दिँदै उनले सो अभियानलाई तीव्रता दिन कार्यकर्तालाई निर्देशन दिएका छन्।
