नेपाली कांग्रेसमा एक समय ‘सच्चिने कि सक्किने ?’ भन्ने प्रश्न चर्को थियो । विशेष महाधिवेशनमार्फत गगन–विश्व पुस्ताले नेतृत्वमा वैधानिक हस्तक्षेप गरेपछि त्यो बहस थाँती राखियो र पार्टी बदलिएको घोषणा गरियो । साथै कांग्रेसले देश नै बदल्ने संकल्प पनि सुनायो । तर निर्वाचनले कांग्रेसका ती दाबीलाई प्रमाणित गरेन ।
चुनावमा नराम्रो पराजयपछि कांग्रेस राष्ट्रिय राजनीतिको दोस्रो ठूलो दल बनेको छ, तर प्रतिपक्षी भूमिकामा भने निकै कमजोर देखिएको छ । आन्तरिक विवाद र घरको किचलोले पार्टीलाई थप पेलिरहेको छ ।
पार्टीको भविष्यबारे अन्योल
अब कांग्रेसको नियति के हुने भन्ने प्रश्न उठेको छ । के सर्वोच्च अदालतको दोस्रो फैसलाले पार्टीको बाटो तय गर्नेछ ? वा त्यसअघि नै कांग्रेसले एकता वा विभाजनको बाटो रोज्नेछ ? यी प्रश्नहरू अहिले पार्टीभित्र जीवित छन् ।
गगनले हालैको एउटा सार्वजनिक कार्यक्रममा बीपीको जुत्तामा आफ्नो खुट्टा हालेको दाबी गरेका छन् । बीपीको जुत्ता जति भरपर्दो जुत्तामा खुट्टा हालेको नेताले देशका समस्या सोच्ने कि घरको झगडा सोच्ने भन्ने उनको प्रश्नले पार्टीभित्र नयाँ बहस सुरु गराएको छ ।
बीपीको विरासत र गगनको परीक्षण
बीपीको विरासत कसले बोक्ने र उत्तराधिकारी को बन्ने भन्ने प्रश्न कांग्रेसमा नयाँ होइन । विगतदेखि नै यस विषयमा बहस र विवाद चल्दै आएको छ । तर गगन स्वयंले बीपीको जुत्तामा खुट्टा हालेको दाबी गरेपछि प्रश्नको केन्द्र उनी नै भएका छन् ।
अब सबैको ध्यान यसैतिर छ कि के गगन बीपीको विरासत सम्हाल्दै त्यही बाटोमा हिँड्न सक्लान् ? वर्तमान उल्झनबाट पार्टीलाई सुरक्षित रूपमा निकाल्न सक्लान् ? विशेष महाधिवेशनपछि पार्टीको मूल नेतृत्वमा रहेका गगनको नेतृत्व क्षमताको परीक्षण अहिले भइरहेको छ ।
