आज २५ साउनमा प्रतिनिधिसभाको बैठक बस्ने भएको छ । दिउँसो १ बजे सुरु हुने बैठकको सम्भावित कार्यसूचीमा दुई मन्त्रीहरूले मौखिक प्रश्नको जवाफ दिने र चार वटा विधेयक प्रस्तुत गरिने विषय समेटिएको संघीय संसद सचिवालयले जनाएको छ ।
सचिवालयका अनुसार बैठकमा परराष्ट्र मन्त्रालय तथा युवा, श्रम र रोजगार मन्त्रालयसँग सम्बन्धित मौखिक प्रश्नहरूको जवाफ सम्बन्धित मन्त्रीहरूले दिने कार्यसूची छ ।
तीन मन्त्रीका विधेयक
व्यवस्थापन कार्यतर्फ अर्थमन्त्री डा. स्वर्णिम वाग्लेले कर्मचारी सञ्चय कोष दशौं संशोधन विधेयक २०८३ प्रस्तुत गर्नेछन् । त्यस्तै, युवा श्रम तथा रोजगारी मन्त्री रामजी यादवले बालश्रम (निषेध तथा नियमित गर्ने) विधेयक २०८३ पेश गर्ने कार्यसूची छ ।
यसैगरी कानुन, न्याय तथा संसदीय मामिला मन्त्री सोविता गौतमले मेलमिलाप सम्बन्धी (दोस्रो संशोधन) विधेयक २०८३ प्रस्तुत गर्नेछिन् ।
गौतमका थप प्रस्ताव
बैठकमा मन्त्री गौतमले नै संवैधानिक निकायका पदाधिकारीहरूको पारिश्रमिक सेवाको शर्त र सुविधासम्बन्धी पहिलो संशोधन विधेयकमाथि विचार गरियोस् भन्ने प्रस्ताव पेश गर्ने सम्भावित कार्यसूची रहेको छ ।
राज्य व्यवस्था तथा सुशासन समितिको प्रतिवेदनसहितको नेपाल विशेष सेवा ऐन २०४२ को साविकको व्यवस्था जगाउने सम्बन्धी विधेयक २०८३ माथि छलफल गरियोस् भन्ने प्रस्ताव पनि गौतमले नै प्रस्तुत गर्नेछिन् । उक्त विधेयकलाई पारित गरियोस् भन्ने प्रस्तावसमेत उनले नै पेश गर्ने तालिका छ ।
