काठमाडौँ। सत्तारुढ दल राष्ट्रिय स्वतन्त्र पार्टी (रास्वपा) की सांसद लिमा अधिकारीले खाना पकाउने ग्यासको अभावबाट नागरिकले भोग्दै आएको सास्ती तत्काल अन्त्य गर्न इन्डक्सन चुल्हो वितरणको योजना सरकारले ल्याउनुपर्ने बताएकी छन्।
प्रतिनिधिसभाको सोमबारको बैठकलाई सम्बोधन गर्दै उनले ग्यासकै लागि सर्वसाधारणलाई मध्यरातसम्म लाइनमा बस्नुपरेकोतर्फ सरकारको ध्यानाकर्षण गराइन्। देशमा विद्युत् खेर गइरहेका बेला खाना पकाउने इन्धनका लागि नागरिक घण्टौं कुरेर बस्न बाध्य भएकोप्रति उनले चिन्ता व्यक्त गरिन्।
वैकल्पिक ऊर्जामा जोड
खाना पकाउने ग्यासको समस्या दीर्घकालीन रूपमा समाधान गर्न वैकल्पिक ऊर्जाको प्रयोग नै उपयुक्त हुने सांसद अधिकारीको भनाइ छ। यसका लागि सरकारले ग्यास वितरणमा मात्रै केन्द्रित नभई इन्डक्सन चुल्होलाई प्रोत्साहन गर्ने कार्यक्रम अघि बढाउनुपर्ने उनले बताइन्।
भान्सामा साँझ र बिहानको खाना पकाउनसमेत कठिनाइ भइरहेका नागरिकले खाली सिलिन्डर बोकेर राति अबेरसम्म लाइनमा उभिनुपर्ने अवस्था छ। एउटातिर बिजुली खेर गइरहेको छ भने अर्कोतिर ग्यासकै पखाइमा नागरिकलाई मध्यरातसम्म कुर्न लगाइएको छ। नागरिकलाई साँच्चै राहत दिने हो भने इन्डक्सन चुल्हो बाँड्ने योजना सरकारले तत्काल ल्याउनुपर्छ।
ग्यास आपूर्ति र विद्युत् नीतिप्रति प्रश्न
ग्यास आपूर्तिमा पटकपटक समस्या आइरहँदा पनि विद्युत् खपतसम्बन्धी नीतिहरूले वैकल्पिक इन्धनको प्रयोगलाई निरुत्साहित गर्ने काम गरिरहेका छन् कि भनेर गम्भीरतापूर्वक समीक्षा गर्नुपर्ने उनको माग छ। यसतर्फ सरकार गम्भीर हुनुपर्ने अधिकारीले बताइन्।
