मध्यपहाडी राजमार्गअन्तर्गत रुकुम पूर्वको रुपगा–पाथीहाल्ने खण्डमा एक दशकपछि पुनः ठेक्का प्रक्रिया अघि बढाइएको छ । बागलुङ सीमानासँग जोडिएको १३ किलोमिटर लामो यो सडक खण्डलाई दुई वर्षभित्र कालोपत्र गर्ने लक्ष्य राखिएको छ ।
नयाँ ठेक्का आह्वानका लागि सर्भे तथा प्राविधिक जाँचपासको काम भइरहेको मध्यपहाडी राजमार्ग आयोजना कार्यालय दैलेखले जनाएको छ । विगतमा भएको निर्माणको मूल्यांकनसँगै आवश्यक तयारी अघि बढाइएको हो ।
पटकपटक म्याद थप्दा पनि काम भएन
२०७३ सालमा भारत–महादेव खिम्ती–सिद्धिशाही जेभीले यो खण्डको निर्माण जिम्मा पाएको थियो । सुरुका दुई वर्ष केही काम भए पनि त्यसपछि निर्माण व्यवसायीले प्रभावकारी काम गरेको देखिएन । ठेक्का सम्झौताअनुसार काम नहुँदा पटकपटक म्याद थपिए पनि बाँकी काम सम्पन्न गर्ने आधार प्रस्तुत भएन ।
बाँकी काम अघि बढाउने सम्भावना नदेखिएपछि गत जेठ १७ गते ठेक्का तोडिएको थियो । असार ३ गते यससम्बन्धी सार्वजनिक सूचना जारी गरिएको आयोजना कार्यालयका इन्जिनियर नवीन खरालले बताए ।
सडक मर्मत र स्थानीयको माग
ठेक्का तोडिएपछि पनि सवारी आवागमनलाई सहज बनाउने प्रयास जारी छ । अहिले नाला खोल्ने, सडक सरसफाइ गर्ने र साना खाल्डाखुल्डी पुर्ने काम भइरहेको छ । नयाँ ठेक्काका लागि सर्भेको काम पनि तीव्र पारिएको छ ।
लामो समयदेखि निर्माण अलपत्र हुँदा स्थानीयले आवागमनमा निकै सास्ती भोग्दै आएका छन् । उनीहरूले सडक निर्माण चाँडो सम्पन्न गर्न माग गरेका छन् । रुकुम पूर्वका प्रमुख जिल्ला अधिकारी कोपिला राईले अब प्रभावकारी ढंगले काम अघि बढाउन आयोजना कार्यालय र सरोकारवाला सबैले सहकार्य गरेर जानुपर्ने बताइन् ।
दुई वर्षमा निर्माण सम्पन्न गर्ने योजना
आयोजना कार्यालयले साउन महिनाभित्र सर्भेको काम सकेर भदौको तेस्रो सातासम्म ठेक्का आह्वान गर्ने तयारी गरेको छ । दसैंअघि ठेक्का सम्झौता गरेर चालु आर्थिक वर्षमा आधा काम सक्ने लक्ष्य राखिएको छ ।
यो खण्डमा बर्खामा बाढीपहिरोको जोखिम र हिउँदमा हिमपात हुने भएकाले बाह्रै महिना निर्माण गर्न कठिनाइ हुने इन्जिनियर खरालले बताए । उनका अनुसार प्रतिकूल मौसमका कारण निर्माण अवधि केही लामो हुने भए पनि अबको दुई वर्षभित्र यो खण्डको काम सम्पन्न गरिनेछ ।
