काठमाडौं, अगस्ट १२ । ग्रेट वाल मोटर्स (जीडब्ल्यूएम) ले आफ्नो प्योर इलेक्ट्रिक एसयूभी ह्याभल जोलियन म्याक्स नेपाली बजारमा लन्च गरेको छ। नाइमा नेपाल मोबिलिटी एक्स्पो २०२६ मा उक्त मोडल सार्वजनिक गरिएको हो।
जीडब्ल्यूएमका अधिकृत आयातकर्ता तथा वितरक भीजी इम्पेक्स प्रालिले यो मोडल भित्र्याएको हो। कम्पनीले विशेष लन्च अफरमा यसको मूल्य रु ५९ लाख ९९ हजार तोकेको छ।
कम्पनीका अनुसार नेपाल ह्याभल जोलियन म्याक्स पाउने विश्वकै दोस्रो बजार हो। यसअघि करिब एक महिनाअघि जीडब्ल्यूएमले नेपालमा अर्को विद्युतीय मोडल ओआरए ५ इभी सार्वजनिक गरेको थियो।
ब्याट्री र रेन्ज
जोलियन म्याक्समा ५८.३ किलोवाटआवर क्षमताको ब्याट्री राखिएको छ। डब्ल्यूएलटीपी चक्रअनुसार एक पटकको पूर्ण चार्जमा ४२० किलोमिटरभन्दा बढी रेन्ज दिने कम्पनीको दाबी छ। यसको ग्राउन्ड क्लियरेन्स १९० मिलिमिटर रहेको छ।
चार्जिङतर्फ यो एसयूभीले ६.६ किलोवाटसम्मको एसी चार्जिङ र डीसी फास्ट चार्जिङ दुवै सुविधा समर्थन गर्दछ।
सुरक्षा तथा ड्राइभर सहायता सुविधा
यसमा एडप्टिभ क्रुज कन्ट्रोल, लेन–किपिङ असिस्ट, लेन–चेन्ज असिस्ट, फर्वार्ड कोलिजन वार्निङ, अटोनोमस इमर्जेन्सी ब्रेकिङ, रियर क्रस–ट्राफिक वार्निङ र रियर क्रस–ट्राफिक ब्रेकिङजस्ता ड्राइभर–सहायता प्रणाली उपलब्ध छन्।
त्यस्तै, अप्रत्यक्ष ड्राइभर फटिग मनिटरिङ प्रणाली र ट्रान्सपरेन्ट अन्डरबडी भ्यु प्रणाली पनि दिइएको छ।
भित्री सुविधा र भिटुएल कार्यक्षमता
भित्री भागमा १४.६ इन्चको टचस्क्रिन, एप्पल कारप्ले, एन्ड्रोइड अटो, वायरलेस चार्जिङ, भ्वाइस रेकग्निसन, ब्लुटुथ कनेक्टिभिटी र छ–स्पिकरको अडियो सिस्टम राखिएको छ। केही भेरियन्टमा प्यानोरामिक सनरुफ, तताउने तथा भेन्टिलेसन सुविधासहितका अगाडिका सिट, विद्युतीय ड्राइभर–सिट समायोजन र एम्बियन्ट लाइटिङजस्ता सुविधा समेत उपलब्ध छन्।
यो मोडलले भेहिकल–टु–लोड (भिटुएल) सुविधा पनि समर्थन गर्दछ। यसबाट बाहिरी उपकरणलाई २२० भोल्ट र ५० हर्ट्जको विद्युत् आपूर्ति गर्न सकिन्छ।
नेपालमा थप मोडल ल्याउने योजना
जीडब्ल्यूएम हाल १७० भन्दा बढी देश तथा क्षेत्रमा सक्रिय छ। कम्पनीले नेपालमा प्रिमियम तथा लक्जरी सेगमेन्टका सवारीसाधनसहित थप नयाँ मोडल भित्र्याउने योजना रहेको जनाएको छ।
